​​​​​​​Şervanên Erkaxweparastinê: Parastina xakê erka tevan e

Ji destpêka Şoreşa Rojava ya 19’ê Tîrmeha 2012'an ve, herêmê Bakur û Rojhilatê Sûriyê li ser xaka xwe rastî êrişên artêşa Tirk a dagirker û çeteyên wê tên. Artêşa Tirk a dagirker û çeteyên wê bi armanca firehkirina qada dagirkeriyê, gef û êrişên xwe li ser herêmê zêde kirine.

Li hemberî êrişên dagirkeriyê û ji bo rizgarkirina herêmên dagirkirî, şervanên Hêzên Erkxweparastinê yên Bakur û Rojhilatê Sûriyê girîngiya xweparastinê destnîşan kir.

Têkildarî wê yekê, şervan Cavreş Qamişlo wiha got: "Parastin û xweparastin xwedî girîngiyeke mezin e û hêmanekî girîng a parastina xak û civakan e, nemaze li Bakur û Rojhilatê Sûriyê ku rûbirûyî gef û êrişên artêşa Tirk a dagirker û çeteyên wê ye."

Çavreş Qamişlo diyar kir ku pêdiviya pêvajoyê bi xurtkirina xweparastinê heye û wiha domand: "Divê her kes xwe biparêze û li hember parastina gelên Bakur û Rojhilatê Sûriyê û destkeftiyên wê berpirsiyar bin. Ji ber ku armanca dagirkeriya Tirk çewisandina nasnameya gelên ku di bin sîwana projeya demokratîk de bi hev re dijîn."

Şervana Hêzên Erkxweparastinê ya Hesekê Dilbîn Til Temir têkildarî vê yekê da zanîn ku armanca dagirkeriyê Tirk dabeşkirin û parçekirina xaka Sûriyê ye û wiha got: "Ez tev li Hêzên Erkaxweparastinê-Jin bûm ku li hemberî çi êrişên li dijî xaka me li kêlek hêzên leşkerî QSD, YPJ û YPG’ê bisekinim."

Dilbîn Til Temir got, divê her ferdek ji civaka Bakur û Rojhilatê Sûriyê tev li hêzên leşkerî bibe û li dijî artêşa Tirk a dagirker û çeteyên wê piştevniya hêzên leşkerî bikin ku armanca wan qirkirina gelên herêmê ye.

Li aliyekî din jî her şervanên bi navên Bêrîvan Ehmed û Viyan Amûdê diyar kirin ku êriş û gefên dagirkeriyê vîna gelên herêmê naşikînin û gotin, armanca dagirkeriyê şikandina vîna gelên herêmê, têkbirina ewlehiya ye.

Her du şervanên Hêzên Erkaxweparastinê bang li tevahî ciwanên herêmê kir ku tev li hêzên leşkerî bibin û rola xwe di parastina welat û sekna li hember êrişan pêk bînin.

Bêrîvan Ehmed wiha gotina xwe bi dawî kir: "Dem dema azadiyê ye û divê tevahî ciwanên Bakur û Rojhilatê Sûriyê tev li hêzên leşkerî bibin, xaka xwe rizgar bikin û li hember êrişên dagirkeriya Tirk û hovîtiya wê bibin mertal."

Gabar Andok jî got: "Li hember çi destwerdanên derve ku hewl didin xaka me dagir bikin, Hêzên Erkaxweparastin li gel QSD’ê mertaleke parastinê ji gelên Bakur û Rojhilatê Sûriyê re, ava kir. Divê gelên herêmê li hember çi êrişên li dijî xaka xwe bisekinin."

(fr)

ANHA