Mîhrîcana 1’emîn a Werzîşê ya Şehîd Baran Mawa li herêma Cizîrê dest pê kir

Tevgera Ciwanên Şoreşger bi koordînakirina Yekitiya Werzîşê ya herêma Cizîrê ev mîhrîcan li dar xist. Tevahî tîmên werzîşê beşdarî mîhrîcanê bûn.

Mîhrîcan dê 7 rojan berdewam bike; 3 roj li Qamişlo, 2 roj li Dêrikê, 2 roj li Hesekê. Dê di mîhrîcanê de tîmên (fûtbol, volleyball, basketbol, pîn-pong, karatê, avakirina bedenê, taykwondo, kickboxing, şatranc, pêşbirka motosiklêtan, pêşbirka bezê, hilkişandina bi dîwarê ve, pêşbirka çandê, şano û şahiya hunerî) beşdar dibin.

Li ser armancên mîhrîcanê, endama Yekitiya Werzîşê ya herêma Cizîrê Nûr Ebdullah da zanîn ku mîhrîcan gaveke ji bo avakirina civakeke azad, şoreşger, rewşenbîr û exlaqî ye.

Di saetên vê sibehê de li hola Yekitiya Werzîşê ya Qamişlo çalakiyên mîhrîcanê, mîna karatê ya xort û keçan, avakirina bedenê û pîn pongê dest pê kirin.

Dûvre maçeke futbolê di navbera Serdemê û Asayîşê de li stada Heysem Kiço li dar ket. Tîma Serdemê bi ser ket.

Şehîd Baran Mawa yek ji fermandarên Tevgera Ciwanan a girêdayî Tevgera Azadiya Kurdistanê bû û di 7’ê Tîrmeha 2018’an de ji ber bombebarana balafirên artêşa Tirk li dijî çiyayên Kurdistanê şehîd bûbû.

(fr)

ANHA