Di hefteyekê de balafirên şer ên Rûsyayê zêdetirî 200 êriş li dijî DAIŞ`ê pêk anîn

Li gorî Navenda Çavdêriya Mafên Mirovan a Sûriyê (SOHR) êrişên hewayî yên balafirên şer ên li dijî deverên belavbûna çeteyên DAIŞ`ê yên li beyara Sûriyê, berdewam in. Balafirên Rûsyayê ji destpêka Cotmehê ve herî kêm 200 êriş pêk anîne.

Êrişên Rûsyayê li dijî derdora Asraya, Resafe û deverên din ên sêgoşeya Heleb-Hemayê û Reqayê, herêma Sexnê, gundewarên Tedmurê, deverên din ên beyara rojhilatê Himsê û beyara Dêrazorê pêk hatin.

Di encama êrişan de herî kêm 17 çete hatin kuştin û 27 çeteyên din birîndar bûn.

Her wiha li gorî SOHR`ê bi van daneyan re ji 24`ê Adara 2019`an ve hejmara kuştiyên hikumeta Şamê gihaşt hezar û 570’yî. Di nav de yên ne sûrî hene û herî kêm 2 leşkerên Rûs hatine kuştin. Li rex wê jî 153 endamên komên alîgirên Îranê yên ji nasnameyên cuda hene.

SOHR`ê diyar kir ku di heman demê de ji ber êrişên çeteyan, 4 karmendên ku di zeviyên gazê de kar dikirin, bi dehan şivan û sivîlên din hatine kuştin. Her wiha SOHR`ê bi bîr xist ku di êriş û topbarana hêzên hikumeta Şamê û Rûsyayê de hezar û 67 çeteyên DAIŞ`ê hatine kuştin.

(şx)