Biryara UNICEF barê xebatkarên avê girantir dike

Piştî ku şêniyên Efrînê ji ber dagirkirina bajarê wan ji aliyê dewleta Tirk a dagirker ve koçber bûn, UNICEF`ê depoyên ava vexwarinê li ser rêyên sereke û şaxî yên gund û navçeyên kantona Şehbayê danîn da ku pêdiviyên şêniyan ji ava vexwarinê peyda bike. Bi taybet ku li herêmê ava bîran nayê vexwarin. Pê re hejmara koçberan zêde bû û hêzên hikumeta Şamê herêm dorpêç kir. 

UNICEF`ê zêdetirî 2 hezar û 400 metrekab ava vexwarinê ji herêmê re peyda dikir. Lê ev rêje ji 11`ê Tîrmehê ve ji ber fişara hikumeta Şamê û vetoya Rûsyaya ya girtina deriyê sînor ê Til Koçerê kêm bûye û bûye hezar metrekab. Di encamê de şêniyên 38 gundan, 3 navçeyan û 80 hezar welatî ji ava vexwarinê mehrûm man.

Her wiha wek encameke xwezayî ya helwesta UNICEF`ê 340 karkerên avê, 140 çavdêr, 167 ajokar û 24 çavdêrên jêderên avê yên kantona Şehbayê saetên xebatên xwe zêde kirin û niha rojane 17 saetan kar dikin da ku avê ji şêniyan re peyda bikin.

Li kantona Şehbayê 12 jêderên ava vexwarinê; li Neyrabiye, Tiana, Xirnata, Fafîn, Til Şiîr, Babins, Erezê, Herbel, Til Rifet, Dêrcimêl, Ziyaretê û Aqîbê hene. Hemû jî tên bikaranîn.

Karker ji saet 05:3`an sibehan heta 11:00`an bi şev kar dikin. Rojane 10 caran sahrîcan tijî av dikin. Pêwîstiya her yekîneyeke avê bi 7 hezar û 200 lître mazot heye da ku 6 hezar metrekab av ji şêniyan re were peydakirin.

Girêdayî mijarê endamê rêveber ê Yekîneya Avê ya kantona Şehba û navçeya Şêrawayê Seydo Seydo got: "Dorpêça ku hikumeta Şamê li herêmê ferz kiriye, bi awayekî neyînî bandor dike, zexta kar li ser kadroya avê bi giştî û miqdara avê ya li şêniyan tê belavkirin bi taybet pir bûye. Ji ber dorpêçê sotomenî bi zehmetî tê peydakirin, di encamê de para şêniyan a avê jî kêm dibe."

(şx)

ANHA

<iframe width="560" height="315" src="https://www.youtube.com/embed/Hzr6VBE3zAo" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>