Di salvegera komkujiyê de banga avakirina komîteyeke lêpirsînê hate kirin

Komên çete di 27’ê Tîrmeha 2013’yan de êrişî bajarokên Til Hasil û Til Eranê kirin, di encamê bi dehan şêniyên şehîd bûn.

Bi boneya salvegera komkujiyê bi dehan şêniyên kantona Şehbayê, rûspiyên eşîran û nûnerên partiyên siyasî li pêşiya navneda Şehîd Axîn Welat a li navçeya Fafînê kom bûn û daxuyanî da. Di kombûnê de alên Meclisa Malbatên Şehîdan û wêneyên şehîdên komkujiyê hildan.

Endama Meclisa Kantona Şehbayê Rifa El-Ehmed daxuyand xwend.

Di daxuyaniyê de hate gotin, berêvara 27’ê Tîrmeha 2013’yan, komên çete yên qaşo Artêşa Azad ên desteka xwe ji dewleta Tirk digirin êrişî gundên Til Eran û Til Hasilê kir, rasterast gule li sivîlan reşandin û her du gund ji tevahî aliyan ve dorpêç kirin.

Hate gotin, di encama êrişê de bi dehan şêniyên her du gundan şehîd bûn û tevahî mal û milkên şêniyan bi navê xenîmetê hatin dizîn.

Di daxuyaniyê de bal hate kişandin komkujî û binpêkirinên ku dewleta Tirk û çeteyên wê li Efrîn, Ezaz, Cerablus, Bab, Serêkaniyê û Girê Spî pêk tînin û hate gotin ev sûc li pêşberî çavê cîhanê didomin, bêyî ku li hemberî wê erka xwe ya exlaqî û qanûnî pêk bînin.

Meclisa Kantona Şehbayê di daxuyaniyê de bang li civaka navnetewaeyî û NY’yê kir ku komîteyeke lêpirsîna rastiyan û eşkerekirina sûcên dewleta Tirk a dagirker û çeteyên wê yên ji kom, DAIŞ’ê û El-Nusra yên li dijî sivîl û gelê Kurd ava bikin û dagirkirina bakurê Sûriyê bi dawî bikin.

Piştî xwendina daxuyaniyê, şênî beşdarî çalakiya bîranînê bûn ku li navenda Şehîd Axîn Welat hat lidarxistin. Di çalakiyên de sînevîzyoneke li ser komkujî û berxwedana şêniyên Til Hasil û Til Eranê hat pêşandan.

Piştî wê Mihemed Weysî helbestên li ser Til Hasil û Til Eran xwendin.

Koma Beram El-Şehba li ser berxwedana her du gundan stran gotin û koma Rebî El-Şehba stranên folklorî gotin.

(fr)

ANHA