Şehîd Seyf bi merasîmekê li Hesekê hate veşartin

Cenazeyê şervanê QSD'ê Deysem Şihada (Seyf) ê dema erka xwe bi cih dianî li Dêrazorê gihişt asta şehadetê, bi merasîmekê bi heybet li goristana Şehîd Dijwar hate veşartin.

Şêniyên bajarê Hesekê  û gundewarên wê cenazeyê şehîd ji pêşiya Meclisa Malbatên Şehîdan wergirt û bi kerwanekî ji dehan erebeyan ku bi wêneyên şehîd hatibûn xemilandin ber bi goristana Şehîd Dijwar a li gundê Dawudiyê ve çûn.

Li goristanê, ji bo şehîdên azadiyê deqeyeke rêz hate girtin û ji aliyê şervanên YPG û YPJ'ê toraneke leşkerî hate lidarxistin.

Ji fermandarên YPJ'ê Newroz Rojhilat sersaxî ji malbatên her du şehîdan re xwest û got: "Şehîdan ji bo azadiya gelên herêmê berdêlên giran dane, em ê şopdarên xeta wan bin heta ku tevahî armancên wan pêk bînin."

Newroz Rojhilat bal kişand ser berxwedana gerîla ya li çiyayên Kurdistanê û wiha domand: "Bi berxwedana gerîla ya li çiyayên Kurdistanê em ê îradeya xwe xurt bikin, bi berxwedana gerîlayan û îsrara serkeftinê em ê armancên xwe bi cih bînin û bersiva hemû êrişan bidin."

Endama Meclisa Malbatên Şehîdan Fatime Elî jî diyar kir ku ew bi şehîdan serbilind in û got, şehîdan ji bo parastina welatê xwe berdêlên mezin dane.

Piştre, Meclisa Malbatên Şehîdan nasnameya şervanê Erka Xweparastinê Eseed El-Hesen ê li Hesekê li ser erka xwe şehîd bûbû, ragihand.

Endama Meclisa Malbatên Şehîdan Rojda Ehmed nasnameyên her du şehîdan xwendin û radestî malbatên wan kirin.

Cenazeyê şehîd Deysem bi diruşme û tilîliyên dayikan hat veşartin.

ANHA