Li Minbicê dewreyek nû ya hêzên Erkaxweparastinê bi dawî bû

Akademiya şehîd Serkeft Azad, bi beşdarbûna malbatên şervanan û fermandariya nivîsgehên Minbic, Tebqa û Kobanê, dewreya xwe ya 11 a hêzên Erkaxweparastinê bidawî kir.

Dewreya ku bi navê şehîd "Şervan Qamişlo" hat vekirin, 214 şervanên hêzên Erkaxweparastinê ji gelek herêmên Bakur û Rojhilatê Sûriyê, tevlê bûn û 46 rojan dom kir.

Merasîma bidawîkirina dewreyê, bi toranek leşkerî ji hêla şervanan ve hate destpêkirin. Piştre ji fermandarên akademiyên hêzên Erkaxweparastinê, Îbrahîm Sofî axivî û ew dewre li şervanan pîroz kir.

Îbrahîm Sofî bal kişand ser salvegera Şoreşa 19'ê Tîrmehê û got: "Şoreşa Bakur û Rojhilatê Sûriyê ji bajarê Kobanê heya Dêrikê dest pê kir. Îro em li ser bingeha destkeftiyên vê şoreşê dimeşin, di vê şoreşê de me zêdeyî 12 hezar şehîd û 25 hezar birîndar da."

Yek ji rûspiyên eşîrên navçeya Sirînê şêx Îbrahîm Mihemed El-Berî jî got: "Hêzên me di têkbirina terorê de, serkeftin bidest xistine û hemû cîhan şahidê vê yekê dike."

Di dawiya merasîmê de, şervanan sond xwarin û soza parastina destkeftiyên şoreşê û parastina mafên jinan dan.

Hêjayî gotinê ye ku Şervan Qamişlo dema li Qamişlo bi erka xwe ya leşkerî radibû, şehîd bû.

(dx)

ANHA