Şandeya Rêveberiya Xweser li Swêdê bi rayedaran re geşedanên dawîn nîqaş kirin

Şandeya Rêveberiya Xweser a Bakur û Rojhilatê Sûriyê li avahiya hikumeta Swêdê ya li Stokholmê bi siyasetmedar û dîplomatên swêdî re civiyan û her du aliyan rêbazên têkoşîna li dijî terorê û rûniştandina ewlehiyê li herêmê, her wiha sûcên dewleta Tirk û çeteyên wê yên li herêmên dagirkirî nîqaş kirin.

Şandeya Rêveberiya Xweser ji cîgirê hevserokatiya Rêveberiya Xweser a Bakur û Rojhilatê Sûriyê Bedran Çiya Kurd, nûnerê Rêveberiya Xweser ê li Ewropayê Ebduselam Mistefa, endamê Daîreya Têkiliyan a Meclisa Sûriya Demokratîk (MSD) Elî Rehmûn û nûnerê Rêveberiya Xweser ê Swêdê Şiyar Elî pêk hat.

Şandeya rêveberiyê ji aliyê serokê Komîteya Têkiliyan a Parlamentoya Swêdê Kenneth Forsland, serokê Komîteya Têkiliyan a Partiya Sosyalîst a Swêdê Anders Osterby, serokê Şaredariya Stokholmê Kader Kosogi, gerînendeya Balmanya Centerê Anna Sodertrum û endamê Komîteya Mafên Mirovan a Parlamentoya Swêdê Thomas Humberberry ve hat pêşwazîkirin.

`EM FEDAKARIYÊN WE YÊN TÊKOŞÎNA LI DIJÎ TERORÊ Û PÊKANÎNA EWLEHIYÊ JI BÎR NAKIN`

Di civînê de berpirsê Komîteya Têkiliyan a Parlamentoya Siwêdê Kenneth Forsland bixêrhatina şandeyê kir û got: “Em minetdarê têkiliya bi we re ne. Em fedakariyên we yên ku ji bo têkoşîna li dijî terorê û pêkanîna aramiyê ji bîr nakin. Pêwîstiya vî şerî bi kedên mezin û bêhempa heye. Hûn bi rola xwe rabûn.”

Paşê her du aliyan geşedanên dawîn ên li Sûriyê û li Bakur û Rojhilatê Sûriyê, nexasim sûcên dewleta Tirk a dagirker nîqaş kirin. Her wiha her du aliyan pêwîstiya meşandina xebatan ji bo parastina ewlehiya herêmê piştrast kir.

Bedran Çiya Kurd di civînê de got: “Doza bingehîn ku her kesî digihîne hev, şerê li dijî terorê û siyasetên dewleta Tirk ên li herêmên dagirkirî ne, bi taybet li Efrîn, Serêkaniyê û Girê Spî. Dewleta Tirk siyaseta tirkkirinê û guhertina demografîk li wan herêman dide meşandin. Ji bo wê şêniyên wê yên resen dide koçberkirin. Em hêvî dikin ku em bi hev re ji bo pêkanîna aştiyê û ewlehiyê ji şêniyên herêmê re kar bikin.”

Der barê rola neyînî ya dewleta Tirk a li Sûriyê de Bedran Çiya Kurd got: “Dewleta Tirk bi rêya siyasetên xwe yên li herêmê armanc dike Împaratoriya Osmanî vejîne, tevliheviyê, şerekî navxweyî derxe û ewlehiya li herêmê têk bibe. Her wiha bi awayekî sereke hewl dide çareseriya aloziya Sûriyê asteng bike.”

Tê payîn ku di çend rojên bê de şandeya Bakur û Rojhilatê Sûriyê serdana gelek welatên ewropî bike û civînan bi şêniyên Bakur û Rojhilatê Sûriyê yên li Ewropayê re li dar bixe.

(şx)

ANHA