Xebatên firehkirina beşa sêyemîn a kampa Girê Spî bi dawî bûn

Rêveberiya Kampa Koçberên Girê Spî bi alîkariya hin rêxistinên ku li kampê dixebitin berfirhekirina sêyemîn a kampê bi dawî kir û hemû pêwîstiyên wê ji kehrebe, av, xetên kanalîzasyonê û hwd bi cih anîn.

Berfirehkirina kampê destpêka Cotmeha sala borî hatibû destpêkirin. Armanc ji vê yekê hejmareke zêdetir a şêniyên kantona Girê Spî yên ji ber êrişên dewleta Tirk û çeteyên wê hatine koçberkirin, lê bi cih bikin.

Di vê çarçoveyê de li erdekî nêzî kampê ku firehiya wê 100 donim e kon danîn û li gorî 33 beşan hate dabeşkirin. Rêveberiyê bi hevkariya rêxistinên ku li kampê dixebitin erd kirê kir, sererast kir û kehrebe lê peyda kir. Kon jî ji aliyê rêveberiyê ve hatin danîn.

Rêxistinên alîkar "Blomond, Akted'' soz dan ku dê xebatên kanalîzasyonê û avakirina sûra kampê bike.

Piştî xebata 8 mehan, rêveberiya kampê ragihand ku xebatên berfirehkirinê bi dawî kir.

Hevserokê Rêveberiya Kampa Koçberên Girê Spî Mihemed El-Şêx ji ANHA'yê re diyar kir ku xebatên berfirhekirinê bi dawî kirin û ji bo pêşwazîkirinê amade ne. Her wiha da zanîn ku kamp têra 550 konan dike.

Di daxuyaniyeke berê ya rêveberiya kampê de hatibû gotin ku dê di vî beşê de pêşwaziya 600 malbatî ji eslê 920 malbatî bike. Li ser vê yekê El-Şêx got: "Me hejmar kêm kir, ji ber ku dê cihên giştî di vê beşî de werin avakirin."

Li ser dema pêşwazîkirinê, Mihemed El-Şêx diyar kir ku 6'ê vê mehê dê dest bi pêşwazîkirina malbatan bikin.

Kampa Koçberên Girê Spî di 22'yê Mijdara 2019'an de li nêzî bajarokê Til Semin ê bakurê Reqayê hate avakirin. Di kampê de 3 hezar û 530 koçber di nava 730 malbatî de hatine bicihkirin.

ANHA