Pêngava rewşenbîran a li dijî dagirkeriya Tirk berfireh dibe

Di 17’ê Gulanê de li dijî dagirkeriya dewleta Tirk 110 rewşenbîran name ji NY, Komkara Erebî, YE, DYA, serokkomarê Iraqê, serokên parlamento û hikumeta Iraqê û serokê hikumeta Başûrê Kurdistanê re şandibû. Piştigiriya ji bo rewşenbîran zêde dibe û heya niha 2 hezar kesî name îmze kiriye.

24 gulan, 2021 09:45

NAVENDA NÛÇEYAN

Li dijî êrişên dagirkeriya Tirk rewşenbîr, siyasetmedar, hunermend, rojnamevan, akademîsyen û çalakavanên mafên mirovan ku di nava wan de Shirin Ebadî, Slavoj Zizek, Baroness Christine Blower, Ghalib M. Ali, Ilhami Al-Meliji jî hene, ketin nava liv û tevgerê.

110 rewşenbîr û çalakvanên mafên mirovan û dostên gelê Kurd li dijî dagirkeriyê, ji bo sekreterê giştî yê Neteweyên Yekbûyî (NY) Antonio Guterres, serokê Dewletên Yekbûyî yên Amerîkayê (DYA) Joe Biden, nûnerê bilind ê Polîtikayên Ewlekarî û Karên Biyaniyan ê Yekitiya Ewropayê (YE) Josep Borrell Fontelles, sekreterê giştî yê Komkara Erebî Ahmed Abu El-Gheit, serokkomarê Iraqê Berhem Salih, serokê parlamentoya Iraqê Muhammed El Helbusî, serokwezîrê Iraqê Mistafa Kazimî, serokê Herêma Kurdistanê Nêçîrvan Barzanî, seroka Parlamentoya Herêma Kurdistanê Rewaz Fayîq name şandin.

Nameya ku hatiye şandin, di heman demê de di înternetê de li ser navnîşana https://stop-turkish-invasion.com/ jî hatiye weşandin û ji îmzeya rewşenbîr, siyasetmedar, hunermend, rojnamevan û parêzvanên mafên mirovan re hatiye vekirin.

Heta niha li ser nêzî 2 hezar kesan îmzeya xwe li binê nameyê danîne. 1000 ji van îmzeyan bi rêya telefonan û bi dest radestî komîteya amadekar hatine kirin.