Malbatên şehîdan: Em ê bi hevgirtin û xurtkirina têkoşînê bi ser bikevin

Malbatên şehîdan li bajarê Helebê nerazîbûna xwe li hember sûcên dewleta Tirk diyar kir û piştrast kir ku têkoşîn rêya serkeftinê ya li dijî faşîzmê ye.

Bavê şehîd Çekdar, Mihemed Xelîl di destpêka axaftina xwe de êrişên dewleta Tirk ên li dijî Başûrê Kurdistanê şermezar kirin û got: "Rêber Abdullah Ocalan berê em hişyar kirin û got ‘Ger êrişên dijmin zêde û dijwartir bibin, wê demê bizanin ku ew di tengasiyekê de ye ku nikare jê derkeve.’ Ev yek diyar dike ku ev qonax têkçûna dewleta Tirk e.”

Xelîl wiha dom kir: "Em amade ne ku bi tevahî hêz û derfetên heyî li dijî wan bisekinin, em ji bilî serkeftinê tiştekî din qebûl nakin. Wekî malbatên şehîdan ji bo parastina destkeftiyên ku bi xwîna şehîdan hatine bidestxistin, em ê li kêleka şervanên xwe çekan hildin û em ê tu carî li hemberî van êrişên ku bandorê li gelê me dikin, teslîm nebin."

Der barê tecrîda li ser rêber Abdullah Ocalan de Xelîl got: "Em dirêjkirina vê tecrîdê ku li ser rêberê me tê ferzkirin, qebûl nakin û em ê bi hemû hêza xwe vê komployê pûç bikin."

Her wiha xwişka her şehîd Sozdar û Dilşêr, Xalîde Hiso got: "Êrişên ku çiyayên Kurdistanê dikin armanc, nayên qebûlkirin, divê em bi her awayî piştgiriya HPG'ê bikin.”

Xalîde destnîşan kir ku divê derfetê nedin dewleta Tirk ku armancên xwe pêk bîne û tecrîda li ser rêber Ocalan yek ji planên dewleta Tirk e ku girêdana gel bi fikir û felsefeya azad ve qut bike, ji ber vê yekê divê gel tu carî teslîm nebe û parastina axa xwe ji Rojava heya Başûr û çiyayên Kurdistanê bidomîne.

Têkildarî mijarê, xwişka şehîd Ruha, Yesmîn Îbo jî destnîşan kir ku divê hemû pêkhate û gel li pêşberî zehmetiyan destên xwe bidin hev.

Yesmîn wiha got: "Em wek malbatên şehîdan soz didin rêberê xwe ku bi hemû hêza xwe bixebitin da ku parastina fikir û felsefeya rêber Abdullah Ocalan bikin.”

(dx)

ANHA

<iframe width="560" height="315" src="https://www.youtube.com/embed/2qs3RPBbL3A" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>