'Divê dadgehek navneteweyî ji bo darizandina çeteyên DAIŞ'ê were vekirin'

Ji destpêka serkeftina leşkerî ve ku QSD'ê di 23'yê Adara 2019'an de li bajarokê Baxozê yê gundewarê rojhilatê Dêrazorê li dijî çeteyên DAIŞ'ê pêk anîbû, di girtîgeh û kampên Bakur û Rojhilatê Sûriyê de bi deh hezaran çeteyên DAIŞ'ê û malbatên wan hene. Bangên derxistina çeteyan û darizandina wan li welatan didomînin.

Têkildarî mijarê rûspiyê eşîra El-Fadil, Menaf El-Reca ji ajansa ANHA`yê re axivî û got: " Em zehmetiya hebûna DAIŞ û malbatên wan a li ser erdên xwe dikişînin, çi di girtîgehê de bin an jî li kampan bin. Li kampa Holê çalakî û fikirê DAIŞ`ê hîne hene, çete qetilkirinê dikin û Eşbal El-Xîlafê perwerde dikin. Ev yek raste rast bandoreke neynî li jiyanê dike. Hin dewletên rojavayî tenê zarok û hin jin wergirtin, lê çete hîna hene  û ev e ya ku dihêle xeterî zêdetir bibe."

Rûspiyê eşîra El-Fadil bang li Konseya Ewlekariyê û  civaka navneteweyî  kir ku li hemberî DAIŞ`iyên girtî berpirsyariyên xwe bi cih bînin û got: "Yan bila her dewleteke hemwelatiyên xwe werbigire û li gorî qanûnên xwe li ser xaka xwe wan darizînin, yan jî bila bi çavdêriya navneteweyî dadgehek li ser xaka Bakur û Rojhilatê Sûriyê hebe da ku wan darizînin."

El-Reca diyar kir ku hebûna DAIŞ`iyan û malbatên wan ji bo Rêveberiya Xweser barekî giran e, nexasim di rewşa aborî ya ku herêm pê re rû bi rû ye.

Menaf El-Reca di dawiyê de got wan ji bo têkbirina wan kujeran û dijminê dîn û mirovahiyê ji tevahiya pêkhateyan şehîd dane û amade ne hîn  bidin.

(eh)

ANHA

<iframe width="560" height="315" src="https://www.youtube.com/embed/i9lckIaqRag" title="YouTube video player" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>