Saziya Çavdêriya Giştî civîna xwe ya yekemîn Ii dar xist

Saziya Çavdêriya Giştî ya Bakur û Rojhilatê Sûriyê civîna xwe ya yekemîn a sondxwarinê endaman xwar.

Civîn li avahiya Rêveberiya Xweser a li bajarê Reqayê bi beşdarbûna endamên komîteyên çavdêriyên yên her heft rêveberiyên xweser û meclisên sivîl û Hevserokê Meclisa Rêveber a Rêveberiya Xweser a Bakur û Rojhilatê Sûriyê Ebid Hamid El-Mihbaş hate lidarxistin.

Piştî deqeya rêzgirtin, Ebid Hamid El-Mihbaş axivî, girîngiya xebatê saziyê û komîteyên girêdayî wê di rêxistinkirina karê tevahî sazî û komîteyên din de destnîşan kir. Her wiha da zanîn ku ku ji bo serxistina projeya Rêveberiya Xweser û neteweya demokratîk divê xebateke cidî were kirin.

El-Mihbaş got: "Saziya Çavdêriyê ya Bakur û Rojhilatê Sûriyê girîng e û pêwîste bi awayekî baş di tevahî saziyan de were aktîvkirin da ku tu kes nikarbe destdirêjî rêveberî û rêveçûna xebata me bike."

El-Mihbaş axaftina xwe wiha domand: "120 hezar karmend di saziyên me de hene û di tevahî qadan de kar dikin, divê Saziya Çavdêriya kar û xebatên karmend û saziyên wê bişopîne."

Piştî axaftina El-Mihbaş, endamên Saziya Çavdêriya Giştî û endamên komîteyên girêdayî wê sond xwarin.

Endamê Serokatiya Saziya Çavdêriya Giştî Mahsûm Elî axivî û rola çavdêriya xebatên saziyan û parastina projeyên wê, her wiha rola wê di pêşxistina xebatê rêveberiyê di saziyên sivîl de, rêxistinkirina xebatên wê li gorî qanûnên Saziya Çavdêriyê û rêziknameya wî destnîşan kir.

Her wiha raporên komîteyên çavdêriyê hatin xwendin.

Saziya Çavdêriyê di navîna 2020'an de bi armanca şopandina karên saziyên Rêveberiya Xweser hate avakirin.

ANHA