Li Şêrawayê bi hezaran li dijî komploya 15'ê Sibatê li qadan bûn

Bi hezaran şêniyên navçeya Şêrawa bi meşekê Komploya Navneteweyî ya li dijî rêber Abdullah Ocalan şermezar kirin û bang li şêniyên Bakur û Rojhilatê Sûriyê kirin ku li hemberî êrişên ku destkeftiyên ku gelê Kurd dike hedef, têkoşînê geş bikin.

12 sibat, 2021 15:13

ŞEHBA

Bi durişmeya "Bimire komploya navneteweyî û îxanet", bi hezaran şêniyên navçeya Şêrawa ya kantona Efrînê herikîn qadan û komploya navneteweyî û êrişên dewleta Tirk a dagirker ên li ser herêma Garê şermezar kirin.

Şêniyan bi posterên rêber Abdullah Ocalan, wêneyên şehîdên Berxwedana Serdemê û Heftanînê, pankartên bi nivîsên "Bimire komploya navneteweyî û îxanet", "Serkeftin serferaziya xeta berxwedanê ye û binkeftin serîdaxistin ji xeta îxanetê re ye", "Bi fikir û felsfeya rêber Abdullah Ocalan em ê Efrîn, Serêkaniyê û Girê Spî rizgar bikin", "Bê serok jiyan nabe" û "Bijî berxwedana gerîla" li gundê Ziyara hatin ba hev û dest bi meşê kirin.

Di meşê de diruşmeyên silavkirina berxwedana Îmralî û şermezarkirina êrişên dewleta Tirk û siyasetên îxanetê hatin berzkirin.

Meş li pêşiya kampa Vegerê ya li deriyê ketina gundê rawestiya. Ji rêveberê Meclisa Naveçeya Şêrawa Hesen Murad axivî û got: "Bi saya fikir û felsefeya rêber Abdullah Ocalan me xwe û dîroka xwe nas kir, me li hemberî faşîzm û çeteyan serkêşiya şoreşê kir û me civakeke demokratîk ava kir."

Murad got, dê xeta rêbertî bişopînin heta ji girtîgeha Îmraliyê azad bibe.