Li kampa Serêkaniyê dibistanek ji bo xwendekarên koçber hate vekirin

Ji ber êrişên artêşa Tirk a dagirker û çeteyên bi nave "Artêşa Nîştimanî ya Sûriyê" yên li dijî herêmên Bakur û Rojhilatê Sûriyê û dagirkirina Serêkaniyê û Girê Spî, gelê van herêman koçber bû. Ji bo bicihkirina van koçberan, Rêveberiya Xweser tevî rewşa dijwar û ambargoya aborî ya li ser herêmê, deriyên dibistanan ji koçberan re vekirin.

Rêveberiya Xweser kampa Waşûkanî di Mijdara 2019`an de li rojavayê navenda bajarê Hesekê li bajarokê Tiwênayê vekir, ji ber ku dibistanan têra hejmara koçberan nedikir û vê yekê bandoreke neyînî li perwerdeyê jî kir.

Rêveberiya Giştî ya Dibistanan a Hesekê piştî hevkariya bi meclisên herêmê re komîteyek taybet ava kir da ku koçberan ji dibistanan derxin û wan li kampa Serêkaniyê ya nû bi cih bikin.

Rêveberiyê ji ber dibistan tune bûn ku xwendekarên koçber lê perwerde bibin, ji beriya 3 mehan ve li kampa Serêkaniyê dibistanekê amade dike. Berpirsa kampa Serêkaniyê Nûra Oso got piştî amadekariyên dibistanê bi dawî bûn û duh hate vekirin, wan zêdetirî hezar xwendekarên qonaxa seretayî pêşwazî kirin.

Nûra Oso destnîşan kir ku armanca wan ji avakirina dibistana li kampê ew e ku xwendekar xwendina xwe berdewam bikin.

Li gorî hevserokê Rêveberiya Giştî ya Dibistanan a Hesekê Azad Mehmûd, li kantona Hesekê hejmara dibistanên aktîf hezar û 25 e, 8 hezar û 646 mamoste û derdora 76 hezar û 906 xwendekarên hemû qonaxên xwendinê hene.

Li dibistana ku li kampa Serêkaniyê hatiye vekirin 13 pol hene û zêdetirî 45 mamoste lê perwerdeyê didin.

Nûra Oso di dawiya axaftina xwe de bang li Rêveberiya Xweser kir ku dibistaneke din jî vekin û wiha axaftina xwe bi dawî kir:"Pêwîstiya kampê bi dibistaneke din jî heye, ji ber ku dibistana ku hatiye vekirin, pir biçûk e û têra xwendekaran nake.”

Dema artêşa Tirk a dagirker û çeteyên wê yên bi navê Artêşa Nîştimanî ya Sûriyê di 9`ê Cotmeha 2019`an êrişî herêmên Bakur û Rojhilatê Sûriyê kir, zêdetirî 68 hezar xwendekar ji mafên xwendinê bê par man.

(eh)

ANHA