​​​​​​​Rûspiyên eşîrên Dêrazorê: Em ê li hemberî planên ku herêmê dikin hedef, bisekinin

Rûspiyên eşîran destnîşan kirin ku bi xurtkirina hevkariyê di navbera rêveberî û eşîran de dê tevahî planên ku aramiya herêmê dike armanc, têk bibe.

Di van demên dawî de rûspiyên eşîran ên ku li meclisên herêmî yên Dêrazorê dixebitin, hatin kuştin.

Li ser mijarê, rûspiyê eşîra El-Xubrat, Dehbel El-Xubra "Kiryarên kuştinê û aliyên ku destekê didin terorê" şermezar kirin û got: "Ev sûc li dijî şêx û rûspiyên eşîran, serokên meclisên sivîl û leşkerî û hemû kesên di nava Rêveberiya Xweser de kar dikin tên kirin."

El-Xubra diyar kir ku armanc ji kuştinan, têkbirina Rêveberiya Xweser û belavbûna fitneyê di nav eşîran de ye. Her wiha îşaret pê kir ku kesên ku bûyerên kuştinê pêk tînin, tên jimartin û hewl didin herêmê xirab bikin.

Dehbel El-Xurba ev tişt anî ziman: "Em texmîn dikin ku hin dewlet destekê didin şaneyên terorîst da ku van kiryaran pêk bînin."

Rûspiyê eşîra Şiêtat, Umer Ebdulrezaq El-Behr destnîşan kir ku armanca hikumetên derdorê hene ew e ku bi qetilkirina sivîlan ewlehiya herêmê xirab bike û fitneyê  di navbera eşîran de derxînin.

Rûspiyê eşîra El-Bixul, Ebdullwehab El-Hemûd jî destnîşn kir ku armanc ji van kuştinan têkbirina Rêveberiya Xweser û aramiya herêmê ne wiha got: "Em ê li kêleka gelê xwe mil bi mil van planan hilweşînin."

Rûspiyê eşîra El-Sayil, Hemada Ebdulezîz sûcên qetilkirinê ku li Dêrazorê têne kirin red kirin û got ku armanc ji kiryarên bi vî rengê têkbirina ewlehiya herêmê ye.

(dx)

ANHA