Şêniyên Şengalê di roja 43`emîn de çalakiya xwe didomînin

Çalakiya ku şêniyên Şengalê ji bo piştgiriya asayîşa Êzidxanê dabûn destpêkirin di roja 43`emîn de didome. Welatiyên Şengalê bang li civaka Êzidî kirin ku xwedî li Êzidxanê derkevin.

13 ÇILE, 2021 08:29

NAVENDA NÛÇEYAN

Şêniyên Şengalê di çarçoveya çalakiyên dijî peymana Bexda û Hewlêrê ya li ser Şengalê de, bi armanca piştgirîdayîna Asayîşa Êzidxanê, li pêşiya avahiya Navenda Asayîşa Şengalê kon vedane.

Çalakiya ku bi dirûşmeya “Em Hemû Asayîş in” hatiye destpêkirin di roja xwe ya 43`emîn de didome .Şêniyên Şengalê kom bi kom serdana konê çalakiyê dikin û piştgiriya xwe ya ji bo çalakgeran nîşand didin.

Şêniyên Şengalê heya niha gelek caran daxwazên xwe pêşkêşî hikumeta Iraqê kirine, lê heya niha rayedarên Iraqê bersivek erênî nedane. Ji ber vê yekê civaka Êzidî diyar dike ku heta daxwazên wan pêk neyên ew ê çalakiyên xwe dewam bikin.

Endama Meclîsa Jinan Nazê Seydo li ser berxwdanê axivî û got; “Li dijî peymana di 9’ê Cotmeha 2020’an ku di navbera hikûmeta Iraq û Hewêrê li ser Şengalê hate îmzekirin, em di nava berxwedanê dene. Em bi ti awayî vê peymanê qebûl nakin, berxwedana dayîk, ciwan û hemû xelkê Şengalê 43 roje dewam dike. Heya Iraq bersivek erênî nede, emê dev ji çalakiya xwe ya rewa bernedin.”