Şehîdê berxwedana Eyn Îsayê Demhat Til Koçer hate oxirkirin

Îro bi sedan şêniyên herêmê û şervanên QSD`ê beşdarî oxirkirina cenazeyê şervanê Hêzên Sûriya Demokatîk Mûrad Elî (Dehmat Til Koçer) bûn ku 18`ê mehê di bersivdayîna êrişên dewleta Tirk a dagirker û çeteyên wê yên li ser navçeya Eyn Îsa de şehîd bûbû.

Şêniyan cenazeyê şehîd Demhat Til Koçer li pêşiya goristana şehîdan a Til Koçerê pêşwazî kir û li goristanê merasîma oxirkirinê bi toraneke leşkerî ji aliyê şervanên Hêzên Erka Xweparastinê ve dest pê kir.

Piştre ji fermandarên QSD`ê Mihyedîn Xêrikî wiha axivî: “Her kes dizane ku ji destpêka şoreşê ve, komên bi navên cuda wekî çeteyên DAIŞ`ê, Cebhet Nusra, Artêşa Azad êrişî herêmê dikin û komkujiyan pêk tînin. Navçeya Til Koçerê jî para xwe ji êrişan girt. Em fedakariyên hemû pêkhateyên Til Koçerê ji bîr nakin ku di oxira parastina xaka û gelê xwe de bi dehan ciwanên xwe dan.”

Endamê Partiya Yekitiya Demokratîk (PYD) Sirûr Şetî jî got: “Şehîd Demhat Til Koçer li Eyn Îsayê destaneke dîrokî nivîsand û hevalên wî hîna li hemberî dijmin li ber xwe didin.”

Şetî sersaxî ji malbata şehîd Demhat re xwest û diyar kir ku malbatên şehîdan nûnertiya demokrasiyê dikin.

Piştî ku axaftin bi dawî bûn, wesîqeya şehîd Demhat Til Koçer hate xwendin û radestî malbata wî hate kirin. Piştre cenazeyê şehîd Demhat li goristana şehîdan a Til Koçerê di nava tilîliyên dayikan û dirûşmên dilsoziya bi şehîdan re, hate veşartin.

(cx)

ANHA