Li Til Hemîsê nexweşiya laşmanya careke din belav dibe

Li gundewarê navçeya Til Hemîsê nexweşiya Laşmanya careke din belav dibe. Di 3 mehên dawîn de hejmara kesên bi vê nexweşiyê ketine gihaşt 332 kesan. Bijîşkan bang li şêniyan kir ku tedbîrên xweparastinê bigirin.

NÛÇE

19 kanûn, 2020 08:17

QAMIŞLO-ŞÎHAB EL-EHMED

Navenda Tenduristiyê ya navçeya Til Hemîsê rojane 3 heta 4 nexweşên laşmanyayê pêşwazî dike. Ji ber wê bijîşk bi fikar in ku ev nexweşî piştî ku di 2018`an de hate tunekirin, careke din li herêmê belav bibe.

Navenda Tenduristiyê ya navçeya Til Hemîsê di salên navbera 2017-2018`an de nexweşiya laşmanyayê bi temamî tune kir û di wan salan de 16 hezar nexweş bi rêya derzî û aşleyan derman kirin.

Nexweşiya Laşmanyayê yan jî mîna ku tê naskirin Hebê Helebê; nexweşiyek perezît e bi rêya mêşa "Qûmê; belav dibe. Ev mêş bi şev çalak dibe. Li şûna cihê pêvedanê, reş dibe. Gelek cureyên vê nexweşiyê hene, yê çermê û yê ku bi hundirê mirov dikeve.

berpirsê beşa nexweşiya Laşmanyayê yê li Navenda Tenduristiyê ya li Til Hemîsê Elî Hisên El-Ibêd piştrast kir ku di çend mehên dawîn de Laşmaneya dîsa li herêmê belav bûye. El-Hisên bang li şêniyan kir ku her kesê bi vê nexweşiyê dikeve yekser berê xwe bide navendê.

Her wiha El-Ibêd bang li şêniyan kir ku tedbîrên xweparastinê bînin cih, di bin tora pêşiyan de xew bikin ji ber ku ev mêş ji şevê heta berbanga sibê çalak e.

(şx)