​​​​​​​Hêvîn Îsmaîl: Rûsyaya garantor soza ku daye me, pêk neanî

Hevseroka kantona Girê Spî Hêvîn Îsmaîl li ser topbaranên bênavber ên dewleta Tirk ên li dijî navçeya Eyn Îsa û helwesta Rûsyayê, axivî.

Hêvîn Îsmaîl wiha got: "Rûsyaya garantor, yekalî ye û li ser tevahî êrişên li dijî navçeya Eyn Îsa û gundewarên bê deng e. Ligel wê jî ew garantorê agirbesta ku di peymana Sochiyê ya 22’yê Cotmeha par de, îmze kiriye."

Dewleta Tirk a dagirker û çeteyên wê rojane Eyn Îsa û gundewarên wê topbaran dikin. Ev topbaran ji nîvê Mijdara îsal ve zêde bûn, derdor û naverasta navçeyê jî tên topbarankirin. Di encama topbaranan de 4 sivîl hatin qetilkirin û 13 jî birîndar bûn, jê zarok û jin jî hene.

Hêvîn Îsmaîl wiha domand: "Ev topbaran binpêkirina tevahî qanûnên navneteweyî ne. Di encamê de tirs û xofek li gel şêniyên navçeyê çêkiriye û di rewşeke nearam de dijî, bi taybet piştî ku topbaran yekser li dijî navenda navçeyê pêk hatin."

Di encama topbarana dewleta Tirk a dagirker a 24’ê Mijdara borî de 3 malên sivîlên li taxa rojavayê navçeyê hatin armancgirtin. Di encamê de 3 sivîl birîndar bûn; jinek û 2 zarokên wê. Ji wê zêdetir jî Gerînendetiya Kehrebê ya li naverasta navçeyê jî hat armanckirin.

Hêvîn Îsmaîl da zanîn ku şênî, şêx û Rûspiyên herêmê, der barê bertekdayîna li ser topbaranên dewleta Tirk tevî bêdengiya Rûsyayê de, bê navber serdana baregeha Rûsyayê ya li nêzî Eyn Îsayê dikin.

Hêvîn Îsmaîl wiha destnîşan kir: "Di her carekê de Rûsya soz dide ku vê van êrişan rawestîne. Lê piştî serdana dawîn a şandeya ji şêniyan ji baregehê re bi çend saetan, dewleta Tirk a dagirker û çeteyên wê bi zêdetirî 30 moşekî derdorê navçeyê topbaran kirin, li gel wê jî Rûsya bê deng bû."

Hevseroka kantona Girê Spî Hêvîn Îsmaîl bang li civaka navneteweyî û Rûsyaya garantor kir ku der barê van êrişên barbarî yên li dijî navçeyê tev bigerin, ji ber heke berdewam kirin, dê pêlên koçberiya şêniyan çêbin.

(fr)

ANHA