120 malbatên ji Sûriyê dê ji kampa Holê derkevin

Ji bo pêkanîna biryara ku Rêveberiya Xweser a Bakur û Rojhilatê Sûriyê di 10`ê Cotmehê de derxistiye, rêveberiya kampa Holê amadekariyên derxistina beşa pêncemîn a koçberên sûrî temam kirin.

Rêveberiya Xweser, Meclisa Sûriya Demokratîk (MSD), Desteya Kar û Barên Civakî û Desteya Hundirîn di 5`ê Cotmeha 2020`an de civînek li dar xist û biryara vegerandina koçberên sûrî ji warên wan re derxist.

Îro, 120 malbatên ku ji 515 kesan pêk tên û ji şêniyên Dêrazorê û gundewarê wê ne, xwe amade dikin da ku ji kampê derkevin.

Fadil El-Ewed ji herêma Sûse ya Dêrazorê ye, ew û malbata xwe ya ku ji 10 kesan pêk tê, spasiya rêveberiya Kampê û berpirsên xebatên derxistinê kir. El-Ewed destnîşan kir ku xizmên wan li Sûse li benda wan in.

Rêveberiya kampê piştî biryara Rêveberiya Xweser a 146`an, piştî derketina beşa yekem a koçberên sûrî yên ji Reqa û Tebqayê, nivîsgeheke vekir. Koçberên ku derdikevin jî navên xwe li nivîsgehê qeyd dikin.

Malbatên sûrî yên ku di nav kampê de dimînin, hinek ji wan dixwazin ji kampê derkevin û hinek din jî naxwazin derkevin, ji ber ku nikarin vegerin herêmên di bin kontrola hêzên hikumeta Şamê de, ji ber tunebûna ewlehiyê û wêranbûna malên wan û derfetên kar li wir peyda nabin.

Erebeyên Hêzên Ewlekariya Hundirîn bi erebeyên ku zêdetirî 500 koçberî vediguhêzin re ji kampê derketin.

Li gorî daneya dawîn a rêveberiya kampê 17 hezar û 530 malbat anku  63 hezar û 800 kes di nav de 6 hezar û 563 malbatên sûrî, di kampa Holê de dimînin.

(şx)

ANHA

<iframe width="560" height="315" src="https://www.youtube.com/embed/biVWTswvX9o" frameborder="0" allow="accelerometer; autoplay; clipboard-write; encrypted-media; gyroscope; picture-in-picture" allowfullscreen></iframe>