‘Divê ciwanên herêmê ji bo bersivdayîna êrişên dagirkeriya Tirk amade bin’

Yekitiya Ciwanên Şoreşger ên Sûriyê piştrast kir ku divê ciwanên Bakur û Rojhilatê Sûriyê ji bo bersivdayîna êrişên dewleta Tirk a dagirker amade bin û got “Yên dikarin êrişan rawestînin, ciwan in.”

21 cotmeh, 2020 12:46

QAMIŞLO

Bi sedan şêniyên Girkê Legê û endamên Yekitiya Ciwanên Şoreşger ên Sûriyê ji bo şermezarkirina topbarana artêşa Tirk a dagirker ji gundên herêma Berav a girêdayî Dêrikê re ku di encamê de 2 sivîl şehîd bûn, meşek li dar xist.

Duh, balafirên bêpîlot ên girêdayî dewleta Tirk a dagirker rêya di navbera gundê Dêrika Berav û Mezrê yên girêdayî herêma Dêrikê de topbaran kirin û 2 sivîl şehîd bûn.

Meş ji qada şehîd Xebat Dêrik dest pê kir. Meşvanan pankartên “Wê axa Bakur û Rojhilatê Sûriyê ji bo Erdogan û DAIŞ`ê bibe goristan” rakirin.

Meş li naverasta navçeyê veguherî mîtîngê. Endama rêveberiya Yekitiya Ciwanên Şoreşger ên Sûriyê Demhat Tolhildan wiha axivî: “Divê ciwanên Bakur û Rojhilatê Sûriyê ji bo bersivdayîna êrişên dewleta Tirk a dagirker li dijî herêmê, amade bin. Ji ber ku yên dikarin êrişan rawestînin ciwan in. Armanca me têkoşîn û berxwedan e û azadiya gelê me erka me ye.”

Her wiha Demhat Tolhildan topbarana artêşa Tirk a dagirker a duh li dijî erebeyeke sivîlan ku di encamê de 2 sivîl şehîd bûn, şermezar kir.

(cx)

ANHA