Li dijî êrişên artêşa Tirk ên li dijî Eyn Îsayê xwendekaran meşek li dar xist

Komîteya Perwerde û Fêrkirinê ya Kantona Girê Spî ji bo şermezarkirina êrişên artêşa Tirk ên li dijî Eyn Îsayê meşek organîze kir. Îna derbasbûyî artêşa Tirk a dagirker êrişî navçeya Eyn Îsayê kir û di encamê de zarokê bi navê Hatim Zêdan ê 9 salî şehîd ket.

Bi sedan xwendekar û şêniyên navçeyê li pêşiya Dibistana Şehîd Hetim Zêdan kom bûn û ber bi Çerxerêya Şaredariyê ya li naverasta navçeyê ve çûn. Xwepêşandêran wêneyên şehîd Hatim Zêdan rakirin.

Xwepêşandêran sloganên "Na ji êrişên artêşa Tirk re, bijî berxwedana QSD`ê" berz kirin.

Li Çerxerêya Şaredariyê meş veguherî mîtîngê. Hevserokê Meclisa Kantona Girê Spî Hemîd El-Ebd axivî û êrişên artêşa Tirk û topbarankirina herêm û gundewarên kantona Girê Spî şermezar kirin. Hemîd El-Ebd got tevî peymanên agirbestê lê dîsa jî artêşa Tirk êriş dike û di encamê de zarokê bi navê Hatim Zêdan gihaşt şehadetê.

Hemîd El-Ebd berxwedana hêzên QSD`ê silav kir û da zanîn ku QSD`ê bersiva êrişên artêşa Tirk û çeteyên wê da.

Bi navê xwendekarên Dibistana Şehîd Hatim Zêdan, xwendekara bi navê Muntesir El-Şewax axivî û êrişên artêşa Tirk şermezar kirin û wiha axaftina xwe dewam kir: "Di encama êrişên artêşa Tirk de hevalê me şehîd ket û civaka navneteweyî berpirsa van êrişan e. Ji ber dewleta Tirk sivîlan û zarokên bêguneh dike armanc."

Li ser navê Komîteya Perwerde û Fêrkirinê ya navçeya Eyn Îsayê jî mamoste Samir Mihemed axivî û got: "Di serî de em sersaxiyê ji malbata şehîd re dixwazin û êrişên artêşa Tirk ên li dijî sivîlan pêk tê, şermezar dikin. Armanca van êrişan tirsandina sivîlan e û di encamê de dewleta Tirk dixwaze sivîl ji malên xwe bar bikin."

Ji roja îna derbasbûyî ve artêşa Tirk a dagirker êrişî Eyn Îsayê dike û duh jî bi topan êrişî taxên bakur û rojavayê navçeyê kir.

Hêzên QSD`ê vê sibê bersiva êrişên artêşa Tirk ên li dijî aliyê rojavayê bakurê navçeyê (derdora gundê Seyda) da.

(eh)

ANHA