Şêniyên Reqayê ji bo bîranîna şehîd Hevrîn Xelef daketin qadan

Li ser bangewaziya Partiya Pêşerojê ya Sûriyê bi hezaran şêniyên bajarê Reqayê û gundewarên wê, endamên meclisên herêmî, endamên Rêveberiya Jinan a Reqayê, endamên Meclisa Sivîl a Reqayê û rûspiyên Reqayê meşiyan.

Xwepêşendanan li qada Itfaiyê ya li bajêr kom bûn. Wêneyên şehîd Hevrîn Xelef, şehîd Ferhad Remedan, alên Partiya Pêşeroja Sûriyê û pankartên “Na ji dagirkeriya Tirk re li Bakur û Rojhilatê Sûriyê”, “Em dagirkeriyê tune bikin û şoreşê biparêzin” û “Bi vîna jinên azad em ê dagirkeriyê tune bikin” hildan.

Meş li ber Parka Şehîd Hevrîn Xelef rawestî û veguherî mitîngê. Di mitîngê de endama Partiya Pêşerojê ya Sûriyê Rîm El-Musa bi navê partiyê şaxê Reqayê daxuyanî da.

Di daxuyaniyê de hate destnîşankirin ku sekretera giştî ya partiyê Hevrîn Xelef di encama kemîna çeteyan de û plana dewleta Tirk a faşîst de hate şehîdxistin û hezkiriyên partiyê û şêniyên Reqayê vê kiryara hovane şermezar dikin. Di berdewama daxuyaniyê de helwestên rêxistinên mirovî û hiqûqî li hemberî doza Hevrîn Xelef hate şermezarkirin û banga darizandina sûcdaran hate kirin.

Di dawiya daxuyaniyê de soza şopandina rêya şehîdan heta avakirina Sûriye pirreng, demokratîk û nanavendî hate dayîn.

Meş bi berzkirina sloganên şermezarkirina binpêkirinên dewleta Tirk a dagirker û silavkirina têkoşîna şehîd Hevrîn Xelef û Berxwedana Rûmetê bi dawî bû.

(şx)

ANHA