Li Reqayê têkildarî salvegera êrişên dagirkeriyê civîneke hat lidarxistin

Buroya Têkiliyên Giştî ya Meclisa Sivîl a Reqayê bi wesîleya salvegera yekemîn a êrişên dagirkirinê yên dewleta Tirk û çeteyên wê yên li ser Serêkaniyê û Girê Spî civînek li navenda Çand û Hunerê ya Reqayê li dar xist.

Civîn bi beşdarbûna bi dehan endamên komîteyên Meclisa Sivîl a Reqayê, şêx û rûspiyên herêmê, endamên Paritya Pêşerojê ya Sûriyê û malbatên şehîdan hate lidarxistin.

Civîn bi deqeyeke rêzgirtin dest pê kir. Piştre sînvîzyonek li ser êrişên hovane yê dagirkirinê yên dewleta Tirk û çeteyên wê yên li ser herêmê hate pêşandan.

Cîgira Meclisa Partiya Pêşerojê ya Sûriyê ya bajarê Reqayê Zuleyxa Ebdî, li ser navê Yekitiya Parêzerên Reqayê parêzer Xalid El-Hesen, li ser navê şêx û rûspiyên Reqayê şêx Tirkî Sûan û li ser navê malbatên şehîdan Şemsa Salih axivîn.

Di axaftinan de hate destnîşanirin ku operasyonên leşkerî yên terorîst ên ku dewleta Tirk û çeteyên wê bi navê "Kaniya Aştiyê" ragihandine, bi dehan sivîl kirin qurbanî û bi dehan jî birîndar kir. Her wiha zêdeyî 300 hezar kes da koçberkirin.

Di axaftinan de bal hat kişandin ser polîtîkayên qirkirina etnîkî û guhertina demografîk ku dewleta Tirk û çeteyên wê li herêmên dagirkirî pêk tînin û îşaret bi sûcên li dijî sivîlan, talankirina şûnwarên herêmê û hewldanên çewisandina çanda herêmê hate kirin.

Her wiha siyasetên dewleta Tirk ku çeteyên Sûrî ji bo berjewendiyên xwe tev li şerên li dewletên din dikin hatin şermezarkirin û hate gotin ku berxwedan berdewam e, heta herêmên Sûriyê yên dagirkerî werin rizgarkirin û berxwedana QSD'ê hate silavkirin.

Piştî axaftinan, endamê Desteya Hevserokatî ya Meclisa Sivîla Reqayê Hesen Mustefa daxuyanî xwend.

Di daxuyaniyê de dagirkeriya dewleta Tirk a li herêmê hate şermezarkirin. Hate diyarkirina ku siyaseta herî xeter a ku Tirkiyê li herêmên dagirkirî dimeşîne, guhertina demografî ye ku zêdeyî 300 hezar malbatên resen hatin koçberkirin û malbatên çeteyan li şûna wan hatin bicihkirin.

Di daxuuyaniyê de bang li civaka navnetewî û rêxistinên hiqûqî hate kirin ku erê xwe bi cih bîne û sûcdarên şer di dadgehên navnetewî de darizanîn û wiha hate bidawîkirin: "Em teqez dikin ku mafê me yê parastina rewa heye ku xak û destkeftiyên gelê xwe biparêzin, em ê bê teredud li hemberî dijminan bisekinin heta her buhistek ji xaka xwe ya dagirkirî vegerînin."

ANHA