Siyasetmedaran piştgiriya HDP'ê kir

Desthilata Tirkiyê li dijî parlamantoyên HDP`ê, siyasetmedar, çalakger û rêxistinên jinan dest bi hemleyên qirkirina siyasî kiriye û bi vê hemleyê dixwaze vîna gelê Kurd bişkîne û planên ku li Rojava nekarî pêk bîne, bi cih bîne.

Têkildarî hemleya ku desthilata Tirkiyê li dijî siyasetmedaran daye meşandin, hin siyasetmedarên ji Dirbêsiyê axivîn û diyar kirin ku ji beriya çend salan ve desthilata Tirk li Bakurê Kurdistanê hewldana qirkirina siyasî û înkara hebûna gelê Kurd dike.

Hevserokê Nivîsgeha Partiya Yekitiya Demokrat a li navçeya Dirbêsiyê Silêman Xelîl axivî û got ku desthilata Tirkiyê li dijî kesên banga mafên xwe dikin, parastina doza xwe dikin û dema şerê Kobanê destek dan birayên xwe yên li Kobanê û li hemberî çeteyên DAIŞ`ê sekinîn, hemleyên binçavkirina siyasî dide meşandin.

Silêman Xelîl got ku armanca dewleta Tirk berdewamkirina sûcên qirkirin û guhartina demografiyê ye û wan ev tişt li herêmên ku Tirkiye li Bakur û Rojhilatê Sûriyê dagir kiriye dîtine.

Silêman Xelîl destnîşan kir ku siyasetmedarên li Bakur û Rojhilatê Sûriyê kiryarên ku Tirkiye li dijî siysetmedaran û têkoşerên li Bakurê Kurdistanê dide meşandin, red dikin. Dîroka dewleta Tirk bi kiryarên dermirovî tê naskirin û ev kiryar bi qanûnên navneteweyî re bi nakok in.

Silêman Xelîl bang li tevahiya saziyên mafên mirovan û qanûnparêzan kir ku li hemberî van sûcên Tirkiye pêk tîne, ji wan qirkirin û guhartina demografiyê bi erka xwe rabe.

Her wiha welatiyê bi navê Hisên El-Elî ku endamê Nivîsgeha Siyasî ya Partiya Çepê Kurd li Sûriyê ye jî axivî û got ku dewleta Tirk qanûnên navneteweyî binpê dike û îro li dijî siyasetmedarên li Tirkiyê û her kesên li vê siyaseta dagirkerane radibe, siyaseta qirkirina siyasî pêk tîne.

Hisên El-Elî bi lêv kir ku siyasetmedar û rojnemevan heke bi wîjdan be dê van kiryarên Tirkiye li dijî gelê bindest dide meşandin, red bike, ji ber dewelta Tirk armanca wê dagirkriin, qetilkirin û her kesên vê siyasetê red dike li dijî wan derdikeve û wan binçav dike, lewma bi sedan siyasetmedar û rojnemevan di girtîgehên dewleta Tirk de hene.

Hisên El-Elî di dawiyê de da zanîn ku artêşa Tirk li pêşberî çavên rêxistinên bi navê "rêxistinên mafên mirovan" van kiryaran pêk tîne, ji ber divê hesab ji Tirkiye bixwazin û dawî li van sûcan bînin.

(eh)

ANHA