Li Reqayê projeya restorekirina deverên dîrokî

Komîteya Çand û Şûnwaran a Meclisa Sivîl a Reqayê projeya restorekirina deverên dîrokî da destpêkirin. Xebatên restorekirinê ji aliyê komîteyên pispor ve ji devera "Qesir El-Benat" dest pê kir.

ÇAND Û HUNER

10 îlon, 2020 13:35

REQA

Komîteya Çand û Şûnwaran a Meclisa Sivîl a Reqayê di çarçoveya xebatê xwe de projeya restrokirina deverên dîrokî yên ku ziyan dîtine.Reqayê da destpêkirin

Xebatên restorekirinê ji devera "Qesir El-Benat" a li aliyê rojhilatê bajêr e ku di sûra Bab Bexdad a dîrokê de ye dest pê kir.

Qesir El-Benat, (Qesira Keçan) ji gelek ode û eywnan û hewşeke berfireh pêk tê. Tê gotin ku di serdema Harûn El-Reşîd xizmetçî tê de dixebitin. Li gorî pisporên warê şûnwar ev cih berê nexweşxaneyek bû.

Li gorî berpirsên projeyê, dê dîwarê qesirê cihê ku ziyan dîtine bi madeya cebsîn û fexar werin sererastkirin, cih were ronîkirin û parkeke li derdora wê were avakirin.

Endamê Komîteya Çand û Hunerê ya Meclisa Sivîl a Reqayê Ebdulxefûr Xelef got: "Piraniya deverên şûnwarî yên li Reqayê di salên dawî de ji ber şer û paşguhkirinê xirab bûn. Piştî lêkolînê me projeyeke restorekirinê da destpêkirin, proje ji Qesir El-Benat dest pê kir. Li gorî derfetan dê cihên din werin restorekirin."

ANHA