Şêniyên Helebê beşdarî konê sersaxiyê yê şehîd Dozdar Hemo bûn

Îro bi sedan şêniyên taxên Şêxmeqsûd û Eşrefiyê yên bajarê Helebê beşdarî konê sersaxiyê yê şehîd Dozdar Hemo bûn.

NÛÇE

9 îlon, 2020 12:15

HELEB

Ji fermandarên HPG`ê Abdurehman Hemo (Dozdar Hemo) di Mijdara 2019`an de, di encama êrişeke hewayî ya artêşa Tirk de şehîd bûbû.

Meclisa Malbatên Şehîdan a taxên Şêxmeqsûd û Eşrefiyê konê sersaxiyê li Qada Şehîdan a li beşa rojavayê taxê vegirt. Konê sersaxiyê bi wêneyên endamê fermandar Dozdar Hemo, wêneyên şehîdên azadiyê û wêneyên rêber Abdullah Ocalan hatin xemilandin.

Saziyên sivîl, Partiya Demokrat a Kurdî li Sûriyê (Konferans), Partiya Pêşerojê ya Sûriyê, Meclisa Sûriya Demokratîk (MSD), Meclisa Jinan a Sûriyê, Partiya Yekitiya Demokrat (PYD), Tevgera Civaka Demokratîk (TEV-DEM), Kongreya Star, Malbenda Çandê ya Helebê, meclis, komîn û şêniyên taxê beşdarî merasîmê bûn.

Li ser navên Kongreya Star, Tevgera Civaka Demokratîk, Malbenda Çandê ya Helebê, Meclisa Malbatên Şehîdan, komîn û meclisên li taxê axaftin hatin kirin. Axêveran sersaxî ji malbata têkoşer Dozdar Hemo, tevahiya şehîdên azadiyê û gelê Kurd re xwest û rola têkoşer Dozdar Hemo ya di rêya azadî û berxwedanê de silav kir.

Axêveran bal kişand ser ku têkoşer Dozdar Hemo bi berxwedan û têkoşîna xwe ya di rêya azadî û pêkanîna xwestekên gelan ên azadî û edaletê de gihaşt asta şehadetê.

Axêveran êrişên dewleta Tirk ên li dijî herêma Heftanînê şermezar kirin û soza şopandina rêya şehîdan da.

Merasîm bi sloganên "Bijî berxwedana Heftanînê” û “Şehîd namirin" bi dawî bû.

(eh)

ANHA