​​​​​​​Cenazeyê du şehîdên Berxwedana Serdemê hatin veşartin

Bi tevlêbûna bi sedan şêniyên Efrîn û Şehbayê cenazeyê şervanên YPG'ê Mihemed Mihemed (Diyar Efrîn) û Mihemed Mehmûd (Çiya Efrîn) yên ku di qonaxa duyemîn a Berxwedana Serdemê de şehîd bibûn bi merasîmekê girêseyî li goristana Şehîdan a navçeya Ehrisê hatin veşartin. Di merasîmê de şehadeta gerîlaya YJA –Star Sorxîn Amed a ku di berxwedana Heftenînê de şehîd bibû hate ragihandin.

Şêniyan cenazeyê şehîdên YPG'ê Diyar Efrîn û Çiya Efrîn ji nexweşxaneya Avrîn a navçeya Fafînê wergirtin û bi kerwanekî erebeyan ber bi goristana Şehîdan a navçeya Ehrisê ve ketin rê.

Li goristanê merasîmek hate lidarxistin ku bi deqeyeke rêzgirtin a bîranîna şehîdên têkoşîna azadiyê dest pê kir. Piştre endamê Meclisa Malbatên Şehîdan Xelîl Ehemd, endamê rêveber ê Meclisa Kantona Efrînê Idrîs Weqas û bi navê Yekitiya Jinên Azad Silava Hisên axivîn.

Di axaftinan de sersaxî ji malbatên şehîdan re hate xwestin û soza şopandina xeta şehîdan ta pêkanîna armancên wan hate dayîn.

Piştî axaftinan nasnameyên herdu şehîdan hatin xwendin û radestî malbatên wan hatin kirin. Meclisa Malbatên Şehîdan nasnameya têkoşer Jolyana Xelo (Sorxwîn Amed) ya ku berxwedana Heftenînê şehîd bibû, ragihand û radestî malbatê kir.

Cenazeyê şehîdên YPG'ê Diyar û Çiya di nava tilîliyên dayikan û diruşmeyên dilsoziya bi şehîdan re hatin veşartin.

ANHA