Qurbaniyên komkujiya Şiêtat hatin bibîranîn

Bi boneya salvgera 6'emîn a komkujiya Şiêtat a ku çeteyên DAIŞ'ê di Tebaxa 2014'an de li dijî êşîreya Şiêtatê ya gundewarê Dêrazorê pêk anîbûn û di encamê de zêdeyî hezar û 300 kes bûn qurbanî û 400 jî winda bûn, merasîmek bîranîn hate lidarxistin.

Bi sedan şênî, kesên ji eşîreya Şiêtat û eşîreyên din ên gundewarê rojhilatê Dêrazorê, nûnerên QSD û saziyên civaka sivîl beşdarî merasîmê bûn.

Merasîm bi deqeyeke rêzgirtin û torana leşkerî ya şervanên QSD'ê dest pê kir.

Ji rûspiyên êla Şiêtat, Ebdulrehman Ebû Fadî axivî û got: "Di salvegera şeşemîn a komkujiya Şiêtat de, em lehengên xwe yên ji bo gund, zarok û gelê xwe canê xwe dane û ji cîhanê re îsbat kirine ku zilmê li ser xwe qebûl nakin, bi bîr tînin.

Di merasîmê de, ji fermandarên QSD'ê Muhezem El-Edhem û Engîn Mihemed jî axivîn û soz dan ku ew ê şerê li dijî zilmê û kesên hewl didin aramiya herêmê têk bibin bidomînin.

Hevserokê Mecilsa Malbatên Şehîdan a Dêrazorê Beşîr El-Xalid bal kişand ser destekdayîna dewleta Tirk a bi çeteyên DAIŞ' re û got: "Îro em bûyera bi êş û sekana ciwanên eşîreya Şiêtat a li hemberî çeteyên DAIŞ'ê bi bîr tînin. Çeteyên DAIŞ'ê yên ku ev komkujî  pêk anîn, desteka xwe ya dirvanî û çekdarî ji Tirkiyê digire, Tirkiyê sînorê xwe ji çeteyan re vekir û ew derbasî herêmê kir da ku komkujiyan pêk bînin. Lê vîna eşîreyê lewaz nebû, ciwanên eşîreyê soza tolhildanê dan û tevî li QSD'ê bûn û herêm ji çeteyan rizgar kirin."

ANHA