Şêniyên herêma Efrînê salvegera Şoreşa 19'ê Tîrmehê pîroz kirin

Bi sedan şêniyên Efrîn û Şehbayê bi şahiyan salvgera 8'an a Şoreşa 19'ê Tîrmehê pîroz kirin.

KAMPA BERXWEDAN

Şahî bi deqeyeke rêzgirtin dest pê kir. Piştre endamê Tevgera Ciwanên Şoreşger a Sûriyê li kampa Berxwedan Reşîd Îbrahîm axivî, rola ciwanan di serxistina şoreşê de destnîşan kir û got: "Pêvajoya ku niha em gihiştine berhemên keda şehîdan e. Divê hemû ciwan bi rihê welatparêziyê beşdarî şoreşê bibin, parastina destkeftiyên vê şoreşê erka me ye."

Komên hunerî yên Tevgera Çand û Hunerê ya kampa Berxwedan stran gotin. Li ber stranan govend hatin girandin.

NAVÇEYA EHRIS

Di pîrozbaniyê de endama rêveber a Kongreya Star a kantona Efrînê Emîna Dengelî bal kişand ser ku Şoreşa Rojava şoreşê jin e û ev got: "Jinan, bi taybet jinên Kurd di hemû qadên jiyanî de serkeftinên mezin bidestxistin, rola xwe di pêşengtiya şoreşê de îsbat kirin.''

Her wiha hevserokê Meclisa Navçeya Ehrisê Fewzî Silêmanî got: "Mîna vê rojê gelê Kurd rejîma Baas ji herêmên xwe qewitandin, rêza xwe kirin yek mafên ku bi hezarên salan ji dest wan hatibû girtin vegerandin."

Piştre stran û dîlan hatin gerandin.

Li navçeya Til Rifet, kampa Vegerê û navçeya Ehdasê şahî hatin lidarxistin.

ANHA