DYA êrişa ku hikumeta Wîfaq û dewleta Tirk amadekariya wê dikin, red dike

Wezareta Karên Derve ya Dewletên Yekbûyî yên Amerîkayê (DYA) bang kir ku rêz ji bo qedexekirina şandina  çekan ber bi Lîbyayê ve bê girtin ku NY’yê ferz kiriye û wiha da zanîn: "Divê tevahî aliyên li Lîbyayê li gorî agirbestê tev bigerin û ji nû ve û bi lez dest bi dan û standinan bikin."

Her wiha li gel rojnameya Şerq El-Ewsat jî diyar kir ku divê pêşketina dan û standinên leşkerî yên Lîbyayê bên parastin û wiha domand: "Me El-Sîrac agahdar kir ku ew li dijî amadekirina êrişa Wîfaq û Tirkiyê ne."

Li aliyekî din jî Wezareta Karên Derve ya DYA’yê di daxuyaniya duh de gotibû ku hevdîtina beriya du rojan di navbera Wezareta Karên Derve û hikumeta Wîfaqê de çêbûye, der barê jevkirina milîsên li Lîbyayê bû.

Li aliyekî din jî bidawîbûna dorpêça li ser Terablusê derfeteke nû afirand û pêwîstiya çareserkirina doza milîsên li rojhilat û rojavayê Lîbyayê çêkir.

Her wiha beriya çend hefteyên borî, rêveberiya Amerîkayê piştrast kir ku divê agirbest li Lîbyayê pêk were û tevahî aliyên şer dikin, di bin çavdêriya qanûn û biryarên navneteweyî de vegerin dan û standinan û destwerdanên derve rawestin.

Bi pêşdeçûna hêzên Wîfaqê yên bi piştevaniya Enqereyê li hember artêşa Lîbyayê bi serkêşiya Xelîfe Hefter li Terablus û derdora wê, aloziya meydanî bilind bû.

(fr)