Li Qamişlo jî madeyên hişbirê hatin şewitandin

Îro 26'ê Hezîranê Roja Tunekirina Hişbirê ya Cîhanê ye. Bi vê boneyê Hêzên Asayîşa Qamişlo kongreyek çapemeniyê li ber dibistana ajotinê ya kevin a bajêr li dar xist. Nûnerên Desteya Hundirîn, Desteya Tenduristiyê, Desteya Jinê û endamên Gerînendeyê Buroya Têkbirina Sûcên Birêxistinkirî amade bûn.

Di kongreyê de endamê rêveber ê Desteya Hundirîn a herêma Cizrîrê Reyan Exte axivî û anî ziman ku hêzên ewlekariyê li dijî  pirsgirêkên ku ziyanê dide civak û exlaqê  tê dikoşe.

Exte spasiya hêzên ewlekariyê kir û bang li şêniyên herêmê kir ku bi rihê berpirsyartî tevbigerin û rewşên bi guman ên bazirganî an bi karanîna madeyên hişbirê agahî bide hêzên Asayîşê.

Endamê rêveber ê Meclisa Dada Civakî ya Herêma Cizîrê Hemdan Xelîl got, Şoreşa 19'ê Tîrmehê şoreş piralî ye, ji aliyên wê parastina civakî û têkoşîna li dijî hişbirê ye.

Xelîl spasiya hêzên Asayîşê kir ku destkeftiyên mirovî diparêze.

Piştre endamê rêveber ê beşê Gerînendeyê Buroya Têkbirina Sûcên Birêxistinkirî Ehmed Hacî daxuyanî xwend.

Di daxuyaniyê de hate gotin ku Hêzên Asayîşê û Têkoşîna Li dijî Sûcên Rêxistinkirî di aliyê girtin bikarhîner û bazirganên madeyên hişbirê û desteserkirina madeyan de destkeftiyên mezin pêk anîn û bi hemû hêza xwe hewl dide îsal vê diyardeyê kêm bike.

Di daxuyaniyê de hate gotin ku di salekê de 131 bazirgên madeyên hişbirê hatin girtin rêjeyek mezin ji heşîş û hebên hişbirê û madeyê din desteser kirin.

Li gorî daxuyaniyê madeyên ku hatin desteserkirin:

53, 807 kg heşîş, 63 çixareyên bi heşîşê pêçandî, 13 şitil heşîşa (Qenbez), 875 gram qenbez, 2,432 kg Heroin û 2 kg, cocaine .

Di dawiya kongreyê de madeyên hişbirê hatin şewitandin

ANHA