Şêniyên Kobanê LI dijî êrişa dagirkeran daketin qadan

Bi hezeran şêniyên kantona Kobanê daketin qadan û êrişa balafira keşfê ya dewleta Tirk a li ser mala welatiya bi navê Emîna Weysî ya li gundê Helincê yê başûr rojhilatê bajarê Kobanê ku di encama wê de 3 jin şehîd bûn, şermezar kir.

Şêniyên bajêr li Qada Jina Azad a bajêr kom bû. Di meşê de dirûşmên şermezarkirina sûcên ku dewleta Tirk li dijî gelê kurd û jinên azadîxwaz pêk tîne, hatin berzkirin.

Meş li qada Şehîd Egîd veguherî mêtîngê. Di mêtîngê de bi navê Tevgera Jinan a herêma Firatê Rewşen Haçim axivî û êrişa dawîn li dijî jinan ku beriya salvegera komkujiya 25`ê Hezîrana 2015`an ji aliyê çeteyên DAIŞ`ê ve pêk hat û di encama wê de 233 sivîl şehîd bûn, şermezar kir.

Rewşen Haçim di axaftina xwe de wiha got: "Bi hatina salvegera komkujiya Kobanê re, dewleta Tirk a dagirker tekez dike ku şîrîka komkujiya ku ji aliyê DAIŞ`ê ve pêk hate ye û careke din malên sivîlên li gundê Helincê bombebaran kir."

Her wiha Hevserokê Meclisa Rêveber a Rêveberiya Xweser a herêma Firatê Mihemed Şahîn jî diyar kir ku careke din dagirkeran malên sivîlan kir hedef û kesên têde şehîd xist.

Mihemed Şahîn wiha domand: "Êrişên bi vî awayî hemû lihevkirinên navnetewî ku di navbera Rêveberiya Xweser û aliyên navnetewî weke DYA û Rûsyayê, binpê dike."

Mihemed Şahîn anî ziman ku di lihevkirinan de hat gotin divê tu alî êrişî aliyê din neke, lê dewleta Tirk bi binpêkirina pîvan û zagonên navnetewî hatiye naskirin.

Mihemed Şahîn wiha dawî li axaftina xwe anî: "Ji bo me weke Rêveberiya Xweser diplomatîk ji pîvaneke istratîjîk û sereke ye. Bawriya me bi diplomat heye. Lê armancên dewleta Tirk a dagirker berfirehe û tu girîngiyê nade şêwazên diplomata siyasî."

Paşê endama Meclisa Giştî ya PYD`ê ya herêma Firatê Eyşe Efendî bi navê malbatên şehîdan ev tişt anî ziman: "Dewleta Tirk bi rêya sûcên li dijî gelê me pêk tîne dixwaze nasnameya çanda kurdî tine bike û qir bike."

Eyşe Efendî bi navê dayik û malbatên şehîdan sersaxî ji malbatên her sê şehîdan re (Zehra Birkul, Emîna Weysî û Hebûn Mele Xelîl) re xwest.

Eyşe di dawiyê de wiha got: "Em weke dayikên şehîdan bang li civaka navnetewî û di serî de Amerîka û Rûsya dikin ku helwestên xwe der barê êrişên dewleta Tirk li dijî gelê me ji dayikên şehîdan re eşkere bikin."

(bx)

ANHA