Şehîdê YPG‘ê Yelmaz Cizîr li Dêrikê hate veşartin

Bi tevlêbûna bi hezaran şêniyên herêma Dêrikê û navçeyên wê cenazeyê şervanê YPG‘ê Yûsif Terkîn (Yelmaz Cizîr) li goristana Şehîd Xebat Dêrik hate veşartin. Meclisa Malbatên Şehîdan nasnameyên şehîdên QSD‘ê Abdullah Kotlo (Tolhildan Xwînrij) û Burhan Yorgan (Dijwar Gever) eşkere kir.

Şêniyan hezaran cenazeyê şehîd Yelmaz Cizîr ji pêşiya nexweşxaneya Dêrikê wergirtin û bi kerwanekî ji dehan erebeyan pêk dihat ber bi goristana Şehîd Xebat Dêrik ve ketin rê.

Li goristanê merasîmek hate lidarxistin. Piştî deqeyeke rêzgirtin endamê Rêveber ê PYD‘ê Salih Dêrik axivî û got: "Di kesayeta van şehîdan de em hemû cangoriyên azadiyê bi bîr tînin û serxaxî ji malbatên wan re dixwazin. Pêvajoya heyî ya ku Kurdistanê tê re derbas dibe yekitiya li hemberî faşîzma dewleta Tirk û çeteyên wê dixwaze."

Ji fermandarên YPG‘ê Mihyedîn Xêrkê jî axivî û got: "Di vê pêvajoyê de ya ku herêmê tê re derbas dibe ji me tê xwestin ku erka xwe bi cih bînin û li ser xeta şehîdan bimeşin ta armancên wan bi cih bînin."

Di berdewama merasîmê de bi navê Kongreya Civaka Îslama Demokratîk Şêx Sînan Seydûş banga xwedîdkertina li nirx û destkeftiyên şehîdan kir.

Piştî axaftinan nasnameya şehîdan hatin xwendin û radestî malbatên wan hatin kirin. Malbatên şehîdan soz dan ku ew ê xeta şehîdan bişopînin.

Di dawiya merasîmê de şervanan cenazeyê şehîd Yelmaz di nava diruşme û tilîliyên dayikan spartin axê.

ANHA