Şêniyên Efrînê ji bo Nexweşxaneya Avrîn dest bi hemleya xwîndayînê kir

Ji bo ku kêmasiya Nexweşxaneya Avrîn a xwînê were peydakirin û zehmetiyê di emeliyatan de nekişîne, bi însiyatîfa Heyva Sor a Kurd şaxê Efrînê xwîn hate komkirin.

CIVAK Û JIYAN

9 ÇILE, 2020 13:19

ŞEHBA

Şêniyên Efrînê yên bi darê zorê koçber bûne û endamên rêxistina Heyva Sor a Kurd ji bo ku alîkariya xwînê bidin û pêwîstiya nexweşên li Nexweşxaneya Avrîn peyda bikin, berê xwe da nuqteya tenduristiyê ya li navçeya Ehresê û xwîn dan.

Ji bo emeliyetan ji bo nexweşan, pêwîstiya Nexweşxaneya Avrîn bi xwînê heye. Ev însiyatîf di demekê de pêk tê ku herêma Şehbayê rojane rastî êrişên artêşa Tirk a dagirker û çeteyên wê tê ku di encamê de welatiyên sivîl birîndar dibin.

Hevserokê Heyva Sor a Kurd Ekrem Ereb der barê mijarê de wiha axivî: "Kantona Şehbayê ji her aliyê ve di dorpêçê de ye. Binpêkirin û topbaran li dijî şêniyan bi awayekî rojane pêk tê. Ji ber vê yekê Nexwaşxaneya Avrîn gelek zehmetiyan dikişîne û ji bo çêkirina emeliyetan ji nexweşan re xwîn pêwîst e.”

Ereb wiha dewam kir: "Dê însiyatîfa me heta peydakirina pêwîstiya Nexweşxaneya Avrîn ji xwînê li hemû gund û navçeyên kantona Şehbayê dewam bike."

(cx)

ANHA