Bi hezaran şêniyên Reqayê ji bo rawestandina êrişan meşiyan

Meş ji çarxerêya Agirvemirandinê(Itfaiye) a li navenda bajêr destpê kir. Gelek şêx û rûspiyên êlên Reqayê û endamên saziyên sivîl û leşkerî tev li meşê bûn.

Di meşê de pankartên ku êrişên dewleta Tirk şermezar dikin û piştgiriya Berxwedana Rûmetê rave dikin hildan û dirûşmeyên piştgiriya bi QSD‘ê re berz dikin.

Şênî di nav kolanên bajarê Reqayê de meşiyan û li ber qada Panorama li rojavayê bajêr kom bûn. Mitîng bi deqeyek rêzgirtin destpê kir. Piştre axaftin bi navên Meclisa Sivîl a Reqayê serokê Buroya Birêxistinkirina Meclisan Munîr El-Xelef û Rêveberiya Jin a Reqayê Şems Ebdulqadêr hatin kirin.

Axaftvanan diyar kirin ku gelên Bakur û Rojhilatê Sûriyê bi tevahiya pêkhateyên xwe li rex QSD`ê ne û nahêlin Cebhet El-Nusra û DAIŞ`ê careke din herêmê dagir bikin.

Axaftvanan gotin, gelên Bakur û Rojhilatê Sûriyê tevahiya komployên li dijî gelên herêmê û yên ku têkbirina projeya herêmê ya neteweya demokratîk armanc dikin red dikin. Axaftvanan bang li NY`î kirin ku ji bo rawestandina dagirkeriya osmanî li herêmê bavêje.

Di dawiyê de axaftvanan teqez kirin ku pêwîste nûnerên herêmên Bakur û Rojhilatê Sûriyê tev li her prosesek siyasî bibin ji ber ku ew beşek nayê parçekirin ji Sûriyê ne û komîteya destûrî ya ku bê Rêveberiya Xweser ava bûye red kirin.

Girêdayî heman mijarê bi sedan şêniyên bajarokê  El-Keramê yê dikeve rojhilatê gundewarê Dêrazorê û gundên derdorê meşiyan. Şênî ji ber qada Selame ya bakurê bajarokê ber bi avahiya Rêveberiya Tirafîkê li başûrê bajarokê ve meşiyan.

Şêniyan alên Hêzên Sûriye Demokratîk û pankartên ku êrişên dagirkeriyê şermezar dikin hildan. Her wiha sloganên dilsoziya bi şehîdên Berxwedana Rûmetê û silavkirina lehengiya Hêzên Sûriye Demokratîk berz kirin.

Meş li ber avahiya Rêveberiya Tirafîkê rawestî û veguherî mitîngê. Mitîng bi deqeyek rêzgirtin destpê kir. Paşê şêx êla El-Berîc Emîr El-Xebûr, endama rêveber a Rêveberiya Jin a El-Kerame Sewsen El-Xelef, endama rêveber a Meclisa Malbatên Şehîdan Ibtîsam El-Ehmed axivîn. Axaftvanan berdewamkirina êrişên dewleta Tirk a dagirker li ser Bakur û Rojhilatê Sûriyê û binpêkirina tevahiya qanûnên navdewletî û mafên mirovan  û agirbestê şermezar kirin.

Her wiha banga muhesebekirina Tirkiyê û çeteyên girêdayî wê ji ber sûcên li herêmê kirine bi taybet bikaranîna çekên qedexekirî, avakirina dagehek navdewletî girêdayî vê mijarê û dabînkirina şêniyên ku di encama talankirina DAIŞ û Cebhet El-Nusra milkûmalên wan de zirar dîtine kirin. Axaftvanan banga dabînkirina vegera şêniyan ji warên xwe re kirin.

(şx)

ANHA