Hevbendî salvegera rizgarkirina Tebqayê pîroz kir

Şahî li Navenda Çand û Hunerê ya Tebqayê hate li darxistin. Girseyek ji endamên saziyên sivîl û leşkerî tevî bi dehan şêniyên herêma Tebqayê tevlî şahiyê bûn.

Şahî bi deqeyek rêzgirtin destpê kir. Paşê bi navê Buroya Jin a Hevbendiya Niştîmaniya Demokratîk a Sûriyê Fatme El-Elî axivî û destnîşan kir ku jin herî zêde para xwe ji zulmê û çewisandinê girtiye, lê piştî rizgarkirina herêmê derfet çêbû ku rola xwe pêk bîne.

Bi navê Meclisa Malbatên Şehîdan, dayika şehîd Gîvara Emîne Ebdulrezaq salvegera duyemîn a rizgarkirina bajêr li tevahiya malbatên şehîdan pîroz kir û destnîşan kir ku bi saya fedekariya QSD`ê Tebqa rizgar bû.

 Hevseroka Meclisa Rêveber a Rêveberiya Sivîl a Tebqayê Hind El-Elî bal kişand ser serkeftinên ku piştî rizgarkirinê hatin bidestxistin û diyar kir ku li herêmê tevî gefên Tirkiyê û bêdengiya civaka navdewletî ya li hemberî kiryarên Tirkiyê xebatên wan dewam in.

Piştre Buroya jin a Hevbendiya Niştimaniya Demokratîk a Sûriyê senevizyonek girêdayî pêşketinên ku li Tebqayê pêk hatine û rola jin a çalak di xizmeta civakê de hate pêşandan.

Buroya Jin xelat li Rêveberiya Sivîl a Demokratîk, Meclisa Malbatên Şehîdan, Navenda Çand û Hunerê, YPJ, QSD`ê belav kir.

Di dawiya şehiyê de beşdaran xelekên govendê li ber stranên gelêrî yên koma Firatê ya Navenda Çand û Hunerê û Koma Zarokan a hunerên gelêrî gerandin.

(şx)
ANHA