Bi boneya rojbûna Ocalan dar têne çandin

4`ê Nîsanê rojbûna Rêberê Gelê Kurd Abdullah Ocalan e. Bi vê boneyê şêniyên bajarê Qamişlo bi dirûşma "Bi rihê 4`ê Nîsanê em ê neteweya demokratîk ava bikin û bi rêber Ocalan re azad bijîn" li Çerxerêya Şehîd Osman Sebrî kom bûn da ku daran biçînin.

Şêniyan zêdetirî 100 dar li ser rêya hizam a ku li bakurê bajêr dikeve, çandin. Gel dirûşmên  têkoşîna li dijî AKP`ê û silavkirina berxwedana Rêberê Gelê Kurd Abdullah Ocalan avêtin.

Ji rêveberên Kongreya Star Xaliya Necar ku beşdarî çandina daran bûye, destnîşan kir ku Ocalan ji bo parastina xweza û ekolojiyê banga çandina daran dikir. Xaliya diyar kir ku ew her tim daran biçînin, dê li ser vê çandê bimînin, dê her tim şopdarên rêya fikr û felsefeya Ocalan bin û ji bo rakirina tecrîdê dê tê bikoşin û li ber xwe bidin.

Welatiya bi navê Emîra Ebdo rojbûna Rêberê Gelê Kurd Abdullah Ocalan pîroz kir û wiha anî ziman: "Ev roj ji bo me girîng e. Rêber Ocalan ne tenê rêberê gelê Kurd e lê belê rêberê tevahî gelên bindest e."

Emîra Ebdo diyar kir ku firkên Ocalan jin di hemû aliyan de bi pêş xistin û wiha dawî li axaftina xwe anî: "Ji ber wê Leyla Guven ji bo rakirina tecrîdê di greva birçîbûnê de ye. Em ê heta azadiya rêber Ocalan û şikandina tecrîdê destekê bidin wan."

Tirbespiyê

Kongreya Star bi boneya rojbûna Rêberê Gelê Kurd Abdullah Ocalan û bi dehan şêniyên navçeya Tirbespiyê berê xwe da Baxçeyê Rêber Abdullah Ocalan û baxçeyê Çerxerêya Azadî û dar lê çandin.

Şêniyan dar di her du baxçeyan de çandin û paşê govend hate gerandin.

(bx)

ANHA