Li Hesekê navenda astengdaran hate vekirin

Desteya Kar û Barên Şehîdan a Kantona Hesekê, îro navendeke taybet ji bo perwerdekirina zarokên astengdar bi navê ‘Navenda Şehîd Rengîn a Zarokan’ vekir.

CIVAK Û JIYAN

25 adar, 2019 13:06

HESEKÊ

Navenda Şehîd Rengîn a Zarokan bi merasîmekê li taxa Til Hecer a Hesekê hate vekirin. Armanca navendê perwerdekirina zarokan û alîkariya wan di aliyê psîkolojîk de ye.

Cîgira hevserokên Desteya Kar û Barên Şehîdan a Herêma Cizîrê Şaha Xelef di vekirina navendê de axivî û diyar kir ku armanca vekirina navendê ew e ku alîkariya zarokan di aliyê psîkolojîk de bikin da ku xwebaweriya wan çêbe û di nav civakê de çalak bin.

Paşê deriyê navendê ji aliyê Emel Zeyîdî xwişka şehîd Rengîn ve ku li çiyayê Cûdî şehîd bûye, hate vekirin.

Endamên navendê diyar kir ku dê 4 pisporên xwedîkirina zarokên astengdar rojane 3 seatan wan perwerde bikin.

Heta niha 20 zarok hatin tomarkirin. Li navendê 75 zarok dikarin werin xwedîkirin, lê eger hejmar bêhtir bibe, dê kar li ser 2 danan bikin û temenê zarokan ji 4 saliyê heta 12 saliyê be.

Navenda astengdaran cara yekemîn e piştî Qamişlo li kantona Hesekê tê vekirin. Tê payîn ku li bajarên din jî di demên pêş de bên vekirin.

(jo)

ANHA