‘Efrîn dê bi têkoşîna ciwanan rizgar bibe’

Di şahiya Newrozê ya Helebê de hate destnîşankirin ku Efrîn dê bi têkoşîna ciwanên wê rizgar bibe. Her wiha hate diyarkirin ku Newroz piştî tartiyê rojek nû ye û çirûska Newrozê hîna geş e.

Newroz 2019

21 adar, 2019 14:40

HELEB

Bi dirûşmeya ‘Bi giyana Newrozê em ê tecrîdê bişkînin û Efrînê rizgar bikin’ şahiya Newroza 2019`an li taxa Şêxmeqsûd a Helebê tê pîrozkirin.

Piştî deqeyek rêzgirtin û vêxistina agirê Newrozê, hevserokê Desteya Rêveber a Tevgera Civaka Demokratîk Xerîb Hiso Newroza 2019`an li tevahiya pêkhateyên herêmê û Rêberê Gelê Kurd Abdullah Ocalan pîroz kir. Hiso destnîşan kir ku agirê Newrozê sembola azadiyê ye û wiha pê de çû: “Rûniştandina rêgezên demokrasiyê û avakirina Sûriyeyek demokratîk û ne navendî hîna geş e. Gelê Bakur û Rojhilatê Sûriyê îro DAIŞ`ê têk dibe û bi wê giyanê dê Efrînê jî ji dagirkeriya Tirk rizgar bikin.”

Endama rêveber a Kongreya Star a Helebê Fatme Hesen Newroza 2019`an li gelê Kurd, Rêberê Gelê Kurd Abdullah Ocalan û çalakgerên greva birçîbûnê yên di girtîgehên Tirkiyê de pîroz kir û destnîşan kir ku Newroz zayîna rojek nû ye.

Fatme tekez kir ku bi berxwedana zîndanan û şervanan li eniyên şer dê Efrîn ji dagirkeriyê rizgar bibe.

Şahiya Newroza 2019`an li taxa berxwedanê bi rêzeçalakiyên hunerî berdewam e.

(şx)

ANHA