Newroza Helebê bi silavkirina Berxwedana Serdemê bi dawî bû

HELEB

Tevahiya pêkhateyên taxa Şêxmeqsûd a Helebê ji Kurd, Ereb û Tirkman beşdarî pîrozbahiya Newroza 2019`an a taxê bûn.

Di pîrozbahiyê de gelek peyam hatin xwendin, YPG`ê, partiyên siyasî wek Partiya Yekîtiya Demokratîk, Partiya Pêşerojê ya Sûriyê û Partiya Konferans a Demokratîk, Buroya Jin a MSD`ê, Meclisa Sûriye Demokratîk, Meclisa Malbatên Şehîdan û Mala Êzidî ya Helebê peyam ji bo şahiyê şandin.

Di peyaman de Newroz li gelê Kurd, şervanên li eniyên şer û çalakgerên greva birçîbûnê hate pîrozkirin. Her wiha hate tekezkirin ku Newroz dê bibe Newroza azadiya Ocalan, tevahiya girtiyên azadiyê û rizgarkirina Efrînê. Di peyaman de soza şopandina têkoşînê û berxwedanê li ser rêgeza neteweya demokratî hate dayîn.

Piştî axaftinan gelek komên hunerî û hunermendan berhemên xwe yên hunerî pêşkêş kirin; Koma Çiyayê Mîra, endama Kevana Zêrîn a Şehbayê Denîz, hunermend Xelîl Can ji Kobanê, ji pêkhateya Ereb hunermend Elî Emîr, her wiha Komên Navenda Çand û Hunerê ya taxê; Koma Zarokên Pêşerojê, Stêrk Efrîn, Yekîtiya Ciwanên Rojava, Şehîd Serhed a dîlanê derketin ser dikê. Her wiha şanoyên kurt ên girêdayî bandora neyînî ya teknolojiya li ser civakê û girîngiya perwerdekirina jinê hatin pêşandan.

Şahî bi gerandina  xelekên govendê li ber stranên Koma Yekîtiya Hunermendan bi dawî bû.

(şx)

ANHA