Şaredariya Şêxmeqsûdê dest bi sererastkirina rêyan kir

HELEB

Şêniyên taxa Şêxmeqsûdê ya bajarê Helebê azara nebaşbûna kolanên taxê dikişîne. Di kortên heyî de av kom dibe û dibe herî ku hem ji şêniyan re û hem jî ji ajokaran re dibe sedema astengiyan.

Ajokarên taxê giliyên xwe rakirin Şaredariya Gel da ku rêyan sererast bikin û çereseriyekê jê re bibînin. Ji aliyê xwe ve jî şaredariyê gilî pejirandin û dest bi çêkirina rêyên ku zirar dîtine, kir.

Piştî lêkolînkirina şaredariyê li ser rewşa rê û kolanan ji duh ve dest bi sererastkirina rêyên sereke yên taxê kiriye. Karê sererastkirinê, destpêkê erda kolanê tê rastkirin û kortên heyî tên tijîkirin bi kevirê hûr û çîmentoyê tên tijîkirin. Di vê hemleyê de 10 karkerên Şaredariya Gel ji 8’ê sibehê heya êvarê dixebitin.

Endezyarê pîşeyî yê Şaredariya Gel a Şêxmeqsûdê Ehmed Berekat di vê derbarê de ji ajansa me ANHA’yê re wiha axivî: "Ew ji werza havînê ve nêz dibin, ji lew re dest bi sererastkirina rêyan kir. Destpêkê rêyên sereke li gorî pêdiviya wê ji kevir û çîmentoyê ji ber zîft tune ye, tên sererastkirin. Ev jî wek rewşa lezgîn ji gel û ajokaran re pêşkêş dikin."

Di dawiyê de Berekat diyar kir ku piştî bidawîkirina rêyên sereke dê dest bi sererastkirina rêyên şaxî jî bikin û wiha got: "Em ê hewl bidin bi gel re li gorî derfetan bibin alîkar."

Hêjayî gotinê ye ku piştî sererastkirina rêyan Şaredariya Gel a li taxê dê dest bi hemleya zanebûna parastina paqijiya taxê bi alîkariya şêniyan bike.

(fr)