Gundewarê rojhilatê Reqayê piştî rizgarkirinê geş dibe

Piştî rizgarkirina Reqa û gundewarên wê, tevgera avahîsaziyê bi wayekî balkêş geş dibe. Girêdayî wê Şaredariya El-Cedîdat ji bilî xebatên şaredariyê yên rojane ji bo vejandina herêmê 17 ruxsetên avahiyan da.

16 adar, 2019 08:38

REQA

Rûbara bajarokê El-Cedîdat berfireh e û ji 6 gundan; Cedîde Kehît, Cedîde Xabûr, Oca, Hemed Esaf, El-Xefiye û Rl-Ewce pêk tê. Ji bilî koçberên ku ji ber ewlehiya herêmê lê bi cih bûne, hejmara şêniyan derdora 25 hezar kesî ye.

Piştî amadekirina Şaredariya El-Cedîdat, 25 karmend xwedî bawername di nav buro û komîteyên şaredariyê de hatin erkdarkirin.

Şaredariyê ji destpêka salê ve, xebatên xwe di vekirina riyan, rakirina cihê çopê yê bêserûber û veguhestina wan ji cihên diyar re dimeşîne.

Beşa Zabite ya girêdayî Şaredariyê dest bi çavdêriya xebatên firnan kir û buheya kîloya nan bi 85 lîreyên Sûriyê diyar kir. Her wiha beşa Zabite çavdêriya sûk û dikanan kir û buheya kelûpelan kontrol kir.

Her wiha Komîteya Xizmetguzariyê 3 riyên bajarokê bi kevirê şikandî sererast kir. Buroya Fenî jî 17 ruxsetên avahiyan da şêniyan. Ji aliyekî din ve 3 diraktorên girêdayî şaredariyê rojane çopê vediguhêzînin derveyî bajarok.

Girêdayî mijarê hevserokê Şaredariya Gel a El-Cedîdat Setam El-Hesen destnîşan kir ku ew pêwîstiyên şêniyan ên bingehîn av, kehrebe û firin peyda dikin û di xebatên xwe de berdewam in.

Hêjayî bibîrxistinê ye ku ji dema rizgarkirina gundewarê rojhilatê bajarê Reqayê 4 şaredarî ji bo xizmeta şêniyên herêmê hatine vekirin. Şaredarî ev in: El-Himêrat, El-Hews, El-Keramê û El-Cedîde.

(şx)

ANHA