‘PYD di pêkanîna biratiya gelan de bi roleke girîng rabû’

QAMIŞlO

Bi dirûşma "Bi rêveberî û birêxistinkirinê em ê Efrînê rizgar bikin û Sûriyeyeke nenavendî û demokratîk ava bikin" Kongreya Partiya Yekitiya Demokratîk (PYD) a li ser asta kantona Qamişlo li Navenda Çand û Hunerê ya Aram Tîgran a bajarokê Rimêlan bi beşdarbûna 700 delegeyan tê lidarxistin.

Piştî deqeyeke rêzgirtinê, hevseroka PYD`ê Eyşe Hiso axaftina destpêkê kir.

Di kongreyê de, bi navê şandeyên beşdar di nav de hevserokê Meclisa Malbatên Şehîdan a Kantona Qamişlo Hesen Ibêd li ser rola partiyê di birêxistinkirina civakê de axivî û wiha got: "Ev partî bi saya şehîdan hate avakirin, her wiha ev partî ku bû bingeha civakan, ji ber ku ji bo birêxistinkirina civakê tê dikoşe û dikaribû biratiya gelan û rêgeza neteweya demokratîk li Sûriyê bi cih bike.”

Bi navê Kongreya Star a kantona Qamişlo Şaha Xelîl axivî û wiha got: "PYD partiyeke siyasî, rêxistinî û civakî ye. Civaka li Sûriyê bi rêxistin kir û beşdarî parastina herêmên Bakur û Rojhilatê Sûriyê ji terorê bû."

Hevseroka Meclisa Kantona Qamişlo Perwîn Xelîl jî axivî û got PYD`ê roleke aktîf li Sûriyê lîst û hêvî dikin ku ev têkoşîna wê li hemû Sûriyê belav bibe.

Kongre bi xwendin û nîqaşên rapora salane ya partiyê û buroyên jinan ên partiyê dewam dike.

Tê payîn ku kongre bi biryaran û bernameya karê salane û hilbijartina meclisa rêveber û hevserokên rêxistinên partiyê li Dêrik û Qamişlo bi dawî bibe.

(jo)

ANHA