1. Kongreya PYD‘ê ya Til Birakê hate lidarxistin

QAMIŞLO

Rêxistina Partiya Yekîtiya Demokratîk (PYD) ya navçeya Til Birak a Kantona Qamişlo bi amadebûna endamên partiyên, şêx û rûspiyên navçeyê û endamên saziyên sivîl kongreya xwe ya yekemîn li dar xist.

Kongre bi dirûşmeya " Bi vîn û rêxistinbûyînê em Efrîn rizgar bikin û Sûriyeke demokratîk û ne navendî ava bikin" li hola civînan hate lidarxistin. Hola civînê bi alên PYD‘ê û pankartên bi nivîsên "Bi rihê berxwedanê em ê li hemberî dagirkeriya Tirkiyê bisekinin" û "Bi berxwedanê em ê destkeftiyên şoreşê misoger bikin" hatibû xemilandin.

Kongrê bi deqeya bîranîna şehîdên azadiyê dest pê kir. Paşê Endama Desteya Rêveber a PYD‘ê Sîlvan Elî geşedanên siyasî li Rojhilata Navîn, bi taybet li ser asta Sûriyê şîrove kir.

Sîlvan di destpêka axaftina xwe de lidarxistina kongreya yekemîn li şêniyên Til Birakê pîroz kir û hêvî kir ku kongre di her aliyan de fêde be.

Sîlvan Elî got: "Herêm di her aliyan de di pêvajoyeke hestiyar de ye, li dijî Sûriyê komplo têne kirin. Ji me tê xwestin ku em bi siyaset û zanebûn nêz bibin û asta xeteriyên li dijî me têne kirin nas bikin."

Sîlvan her wiha bal kişand ser çalakiyên grevên birçîbûnê yên ji bo rakirina tecrîda li dijî Rêberê Gelê Kurd Abdullah Ocalan û got, Rojhilata Navîn bi projeya Rêber Abdullah Ocalan dê bighêje konfederaliyê û ev tişt anî ziman: "Em bi serkeve û rêbertî ji girtîgehê azad bikin."

Di kongrê de endama Meclisa Malbatên Şehîdan a Til Birak Wead El-Ilêwî kongrê li endamên partiyê pîroz kir û diyar kir ku PYD‘ê bi şehîdên xwe tê naskirin û xeta neteweya demokratîk dişopîne.

Her wiha Rêvebera Kongreya Sacîda El-Elî jî axivî û hêvî kir ku kongrê bibe bingeha avakirina civaekek azad û demokratîk.

Piştî axaftinan, endamên dîwana kongrê hatin hilbijartin.

Di kongrê de rapora salane ya xebatên partiyê û plansazî hate xwendin. Piştî nîqaşên berfireh ji aliyê beşdaran ve biryar hatin derxistin.

Ji bo hilbijartina rêveberên PYD`ê li navçeyê dengdan pêk hat. Di encamê de 12 endam hatin hilbijartin. Rêveberên nû sond xwarin ku ew ê erka xwe pêk bînin.

Kongre bi dirûşmeyan bi dawî bû.

ANHA