Bi sedan kesî cenazeyê şehîd Ebdulhemîd spartin axê

DÊRAZOR

Bi sedan şêniyên gundewarên Dêrazorê cenazeyê şehîd Abdulhemîd ji ber deriyê ketina bajarokê Bisêra wergirtin û bi kerwanekî ber bi Goristana Şehîd Hanî El-Hesen ve ketin rê.

Li goristanê ji bo bîranîna cangoriyên azadiyê deqeyeke rêz hate girtin û ji aliyê şervanên Hêzên Displîna Leşkerî merasîma leşkerî pêk hat.

Ji fermandarên Hêzên Ewlekariya Hundirîn Mûsa El-Hisên sersaxî ji malbata şehîd Ebdulhemîd û hemû cangoriyên azadiyê re xwest û diyar kir ku Hêzên Ewlekariya Hundirîn bi nêzîbûna tinekirina çeteyên DAIŞ‘ê re dê sîstema parastinê xurt bike û li dijî hucreyên veşartî yên çeteyan operasyonan li dar bixe.

Endamê Meclisa Sivîl a Dêrazorê Remedan El-Xelef jî got, "Şehîd ji bo jiyaneke azad û bi rumet berdêlên mezin dane, şehîd sax in ti carî namirin, em ê heta dawiyê şopdarên xeta wan bin."

Endama Meclisa Malbatên Şehîdan Suha Mihemed jî got, "Em li ber xwe didin da ku zulmê li ser civaka xwe rakin û civakê ronî bikin. Xwîna şehîdan wê ti carî li erdê nemîne."

Piştî axaftinan nasnameya şehîd hate xwendin û radestî malbata wî hate kirin.

Meclisa Malbatên Şehîdan nasnameya 3 şervanên QSD‘ê ku di Pêngava Bagera Cizîrê ya Şerê Tinekirina Terorê de şehîd bûne eşkere kir. Şehîd ev in "Ednan El-Cabir (Xetab), Cabir El-Îbarahîm (Cewherî) û Hisên El-Elî (Hemed).

Piştre girse nimêj li ser cenaze kir û di nava dirûşmeyên dilsoziya bi şehîdan re spartin axê.

ANHA