Gerînendetiya Çandiniyê ya Tebqayê xebatên piştgiriya cotkaran didomîne

Gerînendetiya Çandiyê ya Komîteya Aborî ya girêdayî Rêveberiya Sivîl a Demokratîk a herêma Tebqayê pêwîstiyên cotkaran ji tov û semad, bi armanca zêdekirina hilberînê û pêkanîna rêgeza xwetêrkirinê peyda dike. Miqdara tov û semadê ku li cotkaran hatiye belavkirin, gihaşt zêdetirî 800 ton tov û 400 ton semad.

17 sibat, 2019 08:33

TEBQA

Ji destpêka vekirina deriyê ruxsetiyê ji hilberîna zivistanê re di nav plansaziya çandiniyê ya 2018-2019`an de di destpêka Cotmeha 2018`an de, Komîteya Çandiniyê belavkirina tov û semad li cotkaran didomîne. Miqdara tovê genim ku hatiye belavkirin bi her du cureyên xwe ve yên hişk û nerm gihaşt zêdetirî 800 tonan.

Ji bo semadê jî, komîteyê du cureyên semadê radestî cotkaran kirin; yorya û super fosfat. Miqdara ku hatiye belavkirin gihaşt zêdetirî 400 ton semad.

Di sala 2018`an de Gerînendetiya Çandiniyê bi çavdêriya komîteyên çandiniyê yên girêdayî wê, serdana malên gel û meclisên herêmî kir da ku ji wan re plansaziya çandiniyê ya zivistanê ragihîne. Li gorî wê divê cotkar hindek girtekan bînin cih da ku ruxsetên çandiyê bigirin û madeyên pêwîst ji semad û tov li gel sotemeniyê wergirin.

Girêdayî mijarê hevserokê Gerînendetiya Çandiniyê endezyar Xalid El-Esker destnîşan kir ku gerînende ji bo bilindkirina asta hilberînê û bicihanîna rêgeza xwetêrkirinê ji 4 mehan ve xebatên belavkirina tov, semad û sotemeniyê li cotkaran, her yek li gorî ruxseta wî û miqdara ku jê re hatiye diyarkirin, berdewam dikin.

Li gorî Buroya Lêkolînên Çandiniyê di sala borî de rûbara zeviyên çandiniyê gihaşt 170 hezar hektar bejî û 8 hezar hektar avî. Tevî wê jî projeya El-Siwêdiyê bi rûbera hezar û 52 hektar û projeya El-Widyan hezar û 650 hektar.

Xalid El-Esker destnîşan kir ku astengiya tekane ku rastî wan tê, di pêkanîna plansaziya zivistana 2018-2019`an de, peydakirina dermanên çandiniyê ye.

Xalid diyar kir ku ji ber derfetên kêm ew nikarin dermanan peyda bikin. Her wiha tekez kir ku komîteyên têkildar serdana zeviyan dikin û wê lêkolîn dikin. Tevahiya nîşaneyên destpêkê yên ku ji wan komîteyan derketine, tekez dikin ku her du hilberînên genim û ceh nexweşî lê tune ye.

Li herêmê baran bi awayekî baş barî û ew jî bi xwe re lêçûna avdanê li cotkaran kêm kir. Komîteya Aborî ya Rêveberiya Sivîl a Demokratîk a Tebqayê bi daxuyaniyekê bang li cotkaran kiribû da ku sûdê ji rewşa hewa bigirin.

(şx)

ANHA