Şêniyên Til Temirê li dijî tecrîdê meşek li dar xist

Bi sedan şêniyên navçeya Til Temir û gundewarên wê bi armanca destekdayîna çalakiya Leyla Guven, şermezarkirina tecrîdkirina Rêberê Gelê Kurd Abdullah Ocalan û bi dirûşmeya "Bi rihê berxwedana girtîgehan em ê tecrîdê bişikînin" meşek li dar xist.

NÛÇE

27 ÇILE, 2019 13:33

HESEKÊ

Kongreya Star û Partiya Yekitiya Demokratîk (PYD) bi armanca şermezarkirina tecrîdkirina Rêberê Gelê Kurd Abdullah Ocalan, destekdayîna çalakiya Leyla Guven û bi dirûşma "Bi rihê berxwedana zindanan em ê tecrîdê bişikînin" meşek li dar xist.

Bi sedan şêniyên navçeya Til Temir û gundewarên tev li meşê bûn. Di meşê de ala Kongreya Star, PYD, wêneyên Leyla Guven û wêneyên Rêberê Gelê Kurd Abdullah Ocalan hatin hildan.

Meş ji ber Meclisa Malbatên Şehîdan dest pê kir. Di meşê de dirûşmeyên "Bê serok jiyan nabe” û silavkirina berxwedana Leyla Guven hatin berzkirin.

Meş li Çerxerêya Şehîd Qendîl veguherî mitîngê. Di mitîngê de ji rêveberên meclisa navçeya Til Temirê Abdulbaqî Kotî axivî û berxwedana girtiyên di girtîgehan de silav kir û destnîşan kir ku dîroka wê berxwedana wan sala 1980`yan li girtîgeha Amedê dest pê kir.

Bi navê Kongreya Star a navçeya Til Temirê Eliya El-Îsa diyar kir ku ew ê heta dawiyê destekê bidin çalakiya Leyla Guven û hemû kesên ku di greva birçîbûnê de, ji ber ku mew nûnertiya îradeya gelê Kurdistanê dikin. Eliya destnîşan kir ku dewleta Tirk a dagirker derfet da birayê Rêberê Gelê Kurd Abdullah Ocalan ku tenê wî 15 deqeyan bibîne, lê tu kes bi vê yekê nayê xapandin û çalakiya wan dê berdewam bike.

Mitîng bi dirûşmeyên silavkirina berxwedana Leyla Guven bi dawî bû.

(bx)

ANHA