'Sûriye ya gelê Sûriyê ye, em dagirkeran qebûl nakin'

REQA

Bi dehan şêniyên bajarê Reqayê û gundewarê wê bi armanca şermezarkirina binpêkirinên artêşa Tirk a dagirker li dijî xaka Bakur û Rojhilatê Sûriyê çalakiya konvedanê li qada El-Muhafza li navenda bajêr li dar xist.

Tevî şêniyan saziyên sivîl û meclisên Reqa û gundewarê wê tev li çalakiyê bûn.

Konê çalakiyê bi pankartên bi nivîsên 'Em hemû ji bo yekîtiya xaka Sûriyê fedayî ne', Mirin ji bo faşîstê serdemê Erdogan re' û 'Serî hildin', hate xemilandin.

Di bin konê çalakiyê de endama rêveber a Rêveberiya Jinan a Reqa û gundewarê wê Necah El-Ehmed axivî û got: "Em îro dengê xwe dikin yek û ji Erdogan re dibêjin em bêdeng namînin. Em ê serî hildin ji ber ku tevna me yek e û kes nikare tevna gelê Sûriyê ji hev bixîne. Bi vîna jin, hêz û gelê xwe em ê xaka xwe ya dagirkirî rizgar bikin. Ji lew re divê em li hember dijminê ku hovantirîn binpêkirinên nemirovî di nav bêdengiya navdewletî de pêk tîne bisekinin û bila bizanibin ku Sûriye ya gelê Sûriyê ye."

Ji aliyê xwe ve endamê Komîteya Ciwan û Werzîşê Enwer El-Ehmed axivî û got: "Em gefên Tirkiyê li dijî herêmê şermezar dikin. Em bi fikr û bedena xwe amade ne li hember her xeteriyekê li ser welatê me, çek rakin û li rex QSD'ê bisekinin.

El-Ehmed wiha domand: "Em bi yek dengî bang dikin ku Sûriye ya gelê Sûriyê ye, dê azad bimîne û kes nikare me ji hev du cuda bike. Em bang li tevahiya cîhanê dikin ku komployên li dijî Sûriyê bi dawî bikin."

Çalakiya konvedanê hîna jî berdewam e.

(şx)

ANHA